भरे क्रीडा संकुलात उन्हाळी क्रीडा शिबिर

पिरंगुट, ता. ४ : भरे (ता. मुळशी) येथील तालुका क्रीडा संकुलात उन्हाळी क्रीडा शिबिराचे आयोजन केले आहे. या शिबिरात चौदाहून अधिक क्रीडा प्रकारांचे प्रशिक्षण दिले जाणार आहे. ध्रूवतारा फाउंडेशन व मुळशी स्पोर्टस् सेंटरच्या संयुक्त विद्यमाने मुळशीतील विद्यार्थ्यांसाठी अ‍ॅथलेटिक्स, आर्चरी, फूटबॉल, क्रिकेट, कुस्ती, टेबलटेनिस, कबड्डी, मल्लखांब, तलवारबाजी, योगासने, मार्शल आर्ट, नेटबॉल आदी खेळांचे मूलभूत प्रशिक्षण दिले जाणार आहे. या उपक्रमासाठी जिल्हा क्रीडा अधिकारी कार्यालय, मुळशी तहसीलदार कार्यालय, मुळशी पंचायत समिती, चैतन्य विद्या प्रतिष्ठान बावधन, तालुका क्रीडा शिक्षक संघटना व भरे ग्रामपंचायत आदी सहयोगी संस्था सहकार्य करणार आहेत.
या शिबिरात ३१ मेपर्यंत रोज सकाळी ७ ते ९ या कालावधीत सहा ते चौदा वयोगटातील मुलांना प्रवेश दिला जाणार आहे. शिबिरात येण्यासाठी बसची सुविधा केल्याची माहिती शिबिर प्रमुख सचिन ववले यांनी दिली. नोंदणीसाठी ९०२८०९४४५४ व ८८८८९८७१८८ या मोबाईलवर क्रमांकावर संपर्क साधावा, असे आवाहन केले आहे.