मुळशीतील स्मशानभूमींना वीज पुरवठा देण्याची मागणी

पिरंगुट, ता. ७ : मुळशी तालुक्यातील सर्व गावांतील स्मशानभूमी व दफनभूमीला विद्यूत पुरवठा करण्याची मागणी पुणे येथील वीज वितरण कंपनीचे अधीक्षक अभियंता राजेंद्र पवार यांच्याकडे केली आहे.
याबाबत माजी सभापती रवींद्र कंधारे, जिल्हा परिषदेचे माजी सदस्य शांताराम इंगवले व ज्ञानेश्वर साठे यांनी दिलेल्या निवेदनात म्हटले आहे की, मुळशी तालुक्यातील अनेक गावांमधील स्मशानभूमी व दफनभूमीला आजतागायत कोणतीही विद्युत पुरवठ्याची व्यवस्था केलेली नाही. त्यामुळे रात्री अपरात्री नागरिकांना अंत्यविधीसाठी विविध समस्यांना सामोरे जावे लागत आहे. बऱ्याच स्मशानभूमी व दफनभूमी या गावापासून लांबवरच्या अंतरावर ओढा किंवा नदीच्या काठी आहेत. रात्रीच्यावेळी तेथे अंत्ययात्रा घेऊन जाताना व अंत्यविधी करताना विद्युत पुरवठा नसल्याने मोठी गैरसोय होते. पावसाळ्यात तर रात्रीच्यावेळी केवळ विद्युत पुरवठ्याअभावी अंत्यविधी करताच येत नाही. त्यामुळे तालुक्यातील सर्व असणाऱ्या स्मशानभूमी व दफनभूमींना लवकरात लवकर विद्युत पुरवठ्याची सोय करावी व तेथील परिसरात स्ट्रीट लाईटची व्यवस्था करावी.