इंदापूर मतदारसंघात साडेतीन लाख मतदार

इंदापूर, ता. ३१ ः ‘‘इंदापूर विधानसभा मतदारसंघात तीन लाख ४१ हजार ४८५ मतदार मतदानासाठी पात्र आहेत. मतदारसंघामध्ये आदर्श आचारसंहितेचे काटेकोर पालन व्हावे, यासाठी नऊ एफएसटी (भरारी पथक) कार्यरत असून पाच ठिकाणी स्थिर निगराणी पथक चोवीस तास नियुक्त केले आहे. तसेच सिव्हिजील अॅपद्वारे आलेल्या तक्रारीवर तत्काळ कार्यवाही करणार आहे,’’ अशी माहिती निवडणूक निर्णय अधिकारी डॉ. कल्याण पांढरे यांनी दिली.

डॉ. कल्याण पांढरे म्हणाले, ‘‘इंदापूर मतदारसंघामध्ये एकूण ३३७ मतदान केंद्र आहेत. या मतदान केंद्रावर एकूण एक लाख ७४ हजार ८३२ पुरुष, एक लाख ६६ हजार ६३१ स्त्री व २२ इतर, असे एकूण तीन लाख ४१ हजार ४८५ मतदार आहेत. या सर्व मतदान केंद्रावर किमान मूलभूत सुविधा उपलब्ध करून देण्यात येत आहेत. मतदानाची टक्केवारी वाढण्यासाठी मतदान जनजागृतीचे कार्यक्रम विविध ठिकाणी राबविण्यात आले. तसेच मतदारसंघात नऊ एफएसटी (भरारी पथक) कार्यरत असून पाच ठिकाणी स्थिर निगराणी पथक रात्रंदिवस नियुक्त करण्यात आले आहे. सिव्हिजील अॅपद्वारे आलेल्या तक्रारीवर तत्काळ कार्यवाही करण्यात येत आहे.
यासह मतदार संघातील सर्व निवडणुकी कामी नियुक्त अधिकारी व कर्मचाऱ्यांना मतदानाचा हक्क बजावण्यासाठी टपाली मतदानाची सुविधा करण्यात आलेली आहे. याकरिता तहसिल कार्यालय प्रशासकीय भवन इंदापूर येथे टपाली मतदान सुविधा केंद्र केले आहे.