‘जनाई’च्या संपादित जमिनीचा मोबदला मिळण्याची मागणी

सुपे, ता. १८ : सुपे (ता. बारामती) येथे झालेल्या शेतकरी संवाद मेळाव्यात जनाई उपसा जलसिंचन योजनेच्या कालव्यामध्ये शेतकऱ्यांच्या संपादित केलेल्या जमिनीचा मोबदला मिळण्याची मागणी करण्यात आली.
जनाई योजनेच्या संदर्भात शेतकरी आणि संबंधित विभागाचे अधिकारी यांचा संवाद मेळावा बुधवारी (ता. १७) झाला. या मेळाव्यात बंद जलवाहिनी, योजनेच्या हक्काचे पाणी मिळावे, योजनेमध्ये समाविष्ट नसलेले तलाव समाविष्ट करून घ्यावेत आदी मागण्या करण्यात आल्या. या मागण्या उपमुख्यमंत्री अजित पवार यांच्या कानावर घालण्यात येतील. त्यानंतर शेतकरी, अधिकारी व पवार यांची बैठक घेण्यात येईल व त्यानंतर सुप्यामध्ये शेतकरी मेळावा घेण्यात येणार असल्याची माहिती अधिकाऱ्यांनी दिली.
याप्रसंगी उपमुख्यमंत्री पवार यांचे विशेष कार्यकारी अधिकारी सचिन यादव, सोमेश्‍वर कारखान्याचे अध्यक्ष पुरुषोत्तम जगताप, राष्ट्रवादीचे तालुकाध्यक्ष राजवर्धन शिंदे, जनाईचे कार्यकारी अभियंता अशोक शेटे, मोहन जाधवर आदींसह शेतकरी उपस्थित होते.