उपोषण आंदोलन छेडण्याचा इशारा

दरम्यान, आठवडे बाजारचा दिवस असल्याने शिरूर बाजार समितीच्या आवारात भाजीबाजार भरला होता. शिरूर तालुक्याच्या ग्रामीण भागाबरोबरच शेजारील पारनेर व श्रीगोंदे तालुक्यातील अनेक शेतकरी शेतमाल, भाजीपाला, फळे विक्रीसाठी आले होते. त्यांच्यासह स्थानिक किरकोळ विक्रेत्यांनीचे शेतमालाचे स्टॉल लावले होते. ग्राहकांचीही बाजारात मोठी गर्दी होती. सायंकाळी बाजार संपण्याच्या काही वेळ आधी कोसळलेल्या पावसाने बाजारकरूंसह शेतकरी व विक्रेत्यांचे हाल झाले. बाजार समितीच्या आवारात सर्वत्र पाणी व चिखल झाल्याने बाजारकरूंना चिखल पाण्यातून वाट काढत घरचा रस्ता धरावा लागला. पथारी मांडून बसलेल्या शेतकरी व विक्रेत्यांचे अतोनात हाल झाले. सर्व शेतमालात पावसाचे पाणी घुसले. हाती लागेल तेवढा माल घेऊन विक्रेत्यांनी सुरक्षितस्थळी धाव घेतल्याने ठिकठिकाणी मोठ्या प्रमाणात शेतमाल उघड्यावरच पडला होता. यात टोमॅटो, वांगी, फ्लॉवर, कोबीसह मेथी, कोथिंबिरीचा बाजार समितीच्या आवरात खच पडला होता. बाजार समितीने शेतकरी व छोट्या विक्रेत्यांना आवश्यक सोयीसुविधा उपलब्ध करून न दिल्यास बाजार समितीच्या आवारात उपोषण आंदोलन छेडण्याचा इशारा सामाजिक कार्यकर्ते प्रीतेश फुलडाळे यांनी दिला.