जुन्नरला अपघातात तीन ठार

ओतूर, ता. १० ः जुन्नर- मढ मार्गावर गणेशखिंडीत पिकअप गाडीला अपघात होऊन तीन जण ठार झाले असून वीसजण गंभीर जखमी झाले आहेत. मृतांत चार वर्षाच्या बालकाचा समावेश आहे.
मंगळवारी (ता. १०) रात्री दहा वाजण्याच्या दरम्यान हा अपघात झाला असून अपघातातील जखमींना जुन्नर, ओतूर व आळेफाटा येथे उपचारासाठी पाठवण्यात आल्याची माहिती ओतूरचे सहायक पोलिस निरीक्षक परशुराम कांबळे यांनी दिली. सदर पिकअप गाडी ही सितेवाडी (ता. जुन्नर) येथील कोटमवाडी परीसरातील असून गाडीमधील सर्वजण एक धार्मिक विधी करून परत येत होते. जुन्नर- मढ मार्गावरील गणेशखिंडीत तीव्र उतारावर पिकअप गाडीचे ब्रेकफेल झाल्यामुळे हा अपघात झाल्याची प्राथमिक माहिती मिळाली आहे. या अपघातात विघ्नेश विलास सांगडे (वय ४), शांताराम दादाभाऊ भारती (वय ४५), बारकाबाई महादू भोईर (वय ५८) (सर्व रा.सितेवाडी- कोटमवाडी, ता. जुन्नर जि.पुणे) यांचा मृत्यू झाला. जखमींची नावे समजू शकली नाहीत.