ओतूर येथे उद्या ‘बळीराजा’ मिरवणूक

ओतूर, ता. ३१ : ओतूर (ता. जुन्नर) येथे दिवाळी पाडवा म्हणजेच बलिप्रतिपदेला येत्या शनिवारी (ता. २) ओतूर शहरात बळीराजाच्या भव्य मिरवणुकीचे आयोजन करण्यात आल्याची माहिती सत्यशोधक भाऊ कोंडाजी डुंबरे पाटील प्रतिष्ठानचे अध्यक्ष सुधाकर डुंबरे यांनी दिली.
सत्यशोधक समाज व भाऊ कोंडाजी डुंबरे पाटील प्रतिष्ठानच्या वतीने यावेळी विविध पारंपारिक कार्यक्रमाचे आयोजन करण्यात येणार आहे. ओतूर नवीन एसटी बस स्थानक ते पांढरी मारुती मंदिर व्यासपीठ अशी भव्य मिरवणूक काढण्यात येणार आहे.
मिरवणुकीत शिवकालीन साहसी कौशल्य दाखवणारे पथक, पारंपारिक वाद्य पथके, महिला लेझीम पथक, झांज पथक, वारकरी दिंडी पथक, भजनी व टाळ पथक, महाराष्ट्राची संस्कृती जपणारे बलुतेदार यांच्यासह अनेक आकर्षण असणार आहे. तसेच बळीराजाच्या प्रतिकृतीची बैलगाडीतून मिरवणूक काढण्यात येणार आहे. यावेळी सामाजिक कार्यकर्ते रमेश डुंबरे यांच्या हस्ते बळीराजा प्रतिमेचे पूजन करण्यात येणार आहे. सांस्कृतिक कार्यक्रम आणि शेतकऱ्यांचा राजा बळीराजाचे स्मरण व महत्त्व सांगणारे व्याख्यानाचे आयोजन केले आहे. या कार्यक्रमाचे हे पहिलेच वर्ष असून, शेतकऱ्यांनी यात मोठ्या संख्येने सहभाग घ्यावा, असे आवाहन प्रतिष्ठानच्या वतीने करण्यात आले आहे.