बिबट्याच्या डरकाळीने पिंगोरीकर भयभीत

वाल्हे, ता. ३१ : पुरंदर तालुक्यातील पिंगोरी हे गाव जसे विविध उपक्रमांमुळे प्रकाशझोतात असते, तसेच ते गेल्या काही वर्षांपासून वन्य प्राण्यांच्या विशेषतः बिबट्याच्या संचारामुळे चर्चेच राहिले आहे. गेल्या काही वर्षांपासून बिबट्यांचा वावर पिंगोरीतील डोंगर-दऱ्यांच्या जवळपास असायचा, तो आता अगदी
लोकवस्तीच्या जवळपास होऊ लागल्याने पिंगोरीकर भयभीत झाले आहेत.
त्यात काल रात्री कवडेवाडी-साकुर्डे या नवीन मार्गावर मुक्त संचार करणाऱ्या बिबट्याने फोडलेल्या जोरदार डरकाळीने पिंगोरीकरांच्या अंगावर काटा उभा केला आहे. वन्यप्राण्यांमध्ये हिंस्र समजल्या जाणाऱ्या बिबट्याचा अधिवास पिंगोरी परिसरात मोठ्या प्रमाणावर दिसून येऊ लागला आहे. महिना पंधरा दिवसांतून एकदा बिबट्याच्या हालचाली किंवा दर्शन शेतकऱ्यांना होत असल्याने आता दिवसाही शेतामध्ये एकट्याने जायची शेतकऱ्यांना भीती वाटू लागली आहे. याबाबत वनविभागाने तातडीची पावले उचलावीत, यासाठी ग्रामस्थ मागणी करू लागले आहेत. गेल्या सहा महिन्यांत सर्वात जास्त वेळा बिबट्याने पिंगोरी परिसरात दर्शन दिल्याने या परिसरात शेतकरीवर्ग भयभीत झाला आहे. हातातोंडाशी आलेली पिके काढण्यासाठी शेतकरी घाबरत आहेत. बुधवारी रात्री उशिरा येथील सागर यादव हे कुटुंबासह रात्री उशिरा साकुर्डे मार्गे पिंगोरीकडे चारचाकीमधून घराकडे येत असताना कवडेवाडी-साकुर्डे मार्गावर घाटामध्ये बिबट्याचा स्वैरसंचार त्यांना पहावयास मिळाला. गाडीच्या लाइटच्या साहाय्याने त्याच्यावर प्रकाशझोत टाकून त्यांनी मोबाईलद्वारे छायाचित्रणही केले. मात्र, बिबट्याने फोडलेल्या जोरदार डरकाळीने धाबे दणाणलेल्या या तरुणाने घराकडे येताना ग्रामस्थांना सावध केले.

सरपंच संदीप यादव म्हणाले, ‘‘पिंगोरी परिसरात गेल्या काही वर्षांपासून मोठ्या प्रमाणावर उपलब्ध असलेला जलसाठा व लपण्यासाठी मिळत असलेला आडोशामुळे हा परिसर बिबट्यासह अनेक वन्यप्राण्यांसाठी आश्रयस्थान बनला आहे. बिबट्यामुळे मानवी जीवितहानी झाली नसली तरी शेतीतील, गोठ्यातील जनावरांवर मात्र हल्ल्याच्या तुरळक घटना घडल्या आहेत. बिबट्यांच्या शिकारीमुळे परिसरातील हरणांची व वन्यजीवांची संख्या कमी होत असल्याने अन्नपाण्याच्या शोधात हे बिबटे लोकवस्तीच्या जवळ फिरू लागल्याने ग्रामस्थांमध्ये भीतीचे वातावरण पसरले आहे.

दुचाकीचा प्रवास टाळण्याचे आवाहन
दरम्यान, पिंगोरी-कवडेवारी मार्गे साकुर्डे या घाटरस्त्यामध्ये बिबट्याचा स्वैरसंचार वाढल्याने या मार्गाने रात्री दुचाकीचा प्रवास टाळण्याचे आवाहन माजी सरपंच जीवन शिंदे यांनी केले आहे.