महामार्गाच्या कडेला कचऱ्याचे ढीग

तळेगाव दाभाडे, ता. १२ : लिंब फाटा ते वडगाव फाट्यापर्यत महामार्गाच्या कडेला कचऱ्याचे ढीग पडले आहे. असेच ढीग तळेगाव स्टेशन ते कातवी रस्त्यावर पडले आहे. शहराच्या वेशीवर पडलेल्या कचऱ्याच्या ढिगाने शहराचे सौंदर्य खराब दिसत आहे. स्वच्छ शहर सुंदर शहर अशी शहराची ओळख आहे. प्लास्टिकमुक्त शहर ही वेगळी ओळख शहराला लाभली आहे. त्याच शहरातील रस्त्यालगत पडलेल्या कचऱ्याने नागरिकांच्या आरोग्याचा प्रश्न या निमित्ताने चर्चेत आला आहे. सेकंडहोमला पसंती असणाऱ्या शहरात मच्छरांचा प्रादूर्भाव वाढली असून मच्छरांपासून बचाव करण्यासाठी नागरिकांना मच्छरदाणी, मच्छर कॉइलचा वापर वाढला आहे. महामार्गाच्या कडेला या कचऱ्यात प्लास्टिकच्या पिशव्या, कापडाच्या चिंध्या, कुजलेले अन्न पडले आहे. त्यावर भटकी जनावरे, गाव डुक्करे, कुत्री ताव मारत आहेत. महामार्गाच्या कडेला ठिकठिकाणी तुटलेल्या फरशांचे तुकडे पडले आहे.