मास्क नसल्याच्या नावाखाली उकळले पैसे महापालिकेचे कर्मचारी असल्याचा केला बनाव

पुणे, ता. १४ : खाकी ड्रेस घातलेले काही लोक महापालिका कर्मचारी म्हणून तुमच्या थेट कार्यालयात येतील.... कर्मचाऱ्यांनी मास्क घातला आहे की नाही याची पाहणी करतील...मास्क नसेल, तर पाचशे रुपये दंड या प्रमाणे पैशाची मागणी करतील...असा काहीसा प्रकार कोथरूड येथील एका कंपनीच्या कार्यालयात घडला. कार्यालयात आलेल्या चौघांनी तेथील कर्मचाऱ्यांना महापालिकेचा शिक्का असलेल्या दंडाच्या पावत्या दिल्या आणि पैसे मात्र स्वत:च्या अकाउंटवर घेतले.

खासगी आस्थापना अथवा कार्यालयात थेट शिरून कर्मचारी मास्क वापरत आहे की नाहीत, अशी पाहणी करण्याच्या सूचना अथवा आदेश महापालिकेने त्यांच्या कर्मचाऱ्यांना दिलेले नाहीत. असे असतानाही हे प्रकार शहरात सुरू झाले आहेत. कोथरूड येथील एका कमर्शिअल कॉम्प्लेक्समध्ये घडलेल्या प्रकारावरून हे उघडकीस आले आहे. विशेष म्हणजे महापालिकेचे कर्मचारी असल्याचे भासविणाऱ्या या चौघांनी त्या कॉम्प्लेक्समधील अन्य कोणत्याही कार्यालयात जाऊन तपासणी केली नाही. केवळ ज्या कार्यालयात महिला आहेत, त्याच कार्यालयात जाऊन ही तपासणी केली असल्याचेही समोर आले आहे.

या वेळी दंडाची रोख रक्कम न देता क्यूआर कोड अथवा ऑनलाइन भरण्याची तयारी दर्शविली. त्यास त्यांनी नकार दिला. या वेळी त्यापैकी एका कर्मचाऱ्याने स्वत:चा गुगल अकाउंट नंबर देऊन त्यावर पैसे पाठविण्यास सांगितले. गुगल अकाउंटवर पैसे जमा झाल्याचे दिसताच ते कर्मचारी निघून गेले.

खासगी आस्थापना अथवा कार्यालयात जाऊन तेथील कर्मचाऱ्यांनी मास्क घातले आहेत की नाहीत, अशी तपासणी करण्याबाबतचे कोणतेही आदेश कर्मचाऱ्यांना देण्यात आलेले नाहीत. कोथरूडमध्ये जो प्रकार घडला, त्याची चौकशी करण्यात येईल. अशा प्रकारे कोणी कार्यालयात येऊन चौकशी करीत असेल, तर त्यांच्याकडे महापालिकेचे ओळखपत्र मागावे.
- राजेंद्र बिनवडे, अतिरिक्त महापालिका आयुक्त, पुणे महापालिका