‘पीटीपी’ ॲपमुळे चोरीस गेलेल्या दुचाकीचा शोध

बालेवाडी, ता. ९ : शहरांमध्ये गुन्हेगारी आटोक्यात आणण्यासाठी सुरू केलेल्या पुणे ट्रॅफिक (पीटीपी) ॲपच्या माध्यमातून बाणेर वाहतूक पोलिसांनी चोरीस गेलेली एक दुचाकी शोधून ती सहकारनगर पोलिसांकडे सोपवली. या ॲपच्या प्रभावी वापरामुळे चोरीच्या वाहनांचा शोध वेगाने लागण्यास मोठी मदत होत आहे.
बाणेर परिसरातून ‘पीटीपी’ ॲपवरून एका व्यक्तीने बेवारस वाहनाबाबत पोलिसांना माहिती दिली. त्यानुसार बाणेर वाहतूक पोलिसांनी ती दुचाकी ताब्यात घेतली. चौकशीत ती दुचाकी चोरीस गेल्याची नोंद सहकारनगर पोलिस ठाण्यात करण्यात आल्याची माहिती समोर आली. पोलिस हवालदार सी. व्ही. जाधव यांनी ती दुचाकी ताब्यात घेत सहकारनगर पोलिस ठाण्याकडे सोपवली आहे, असे बाणेर वाहतूक विभागाच्या साहाय्यक पोलिस निरीक्षक पी. एम. डोंगरे यांनी सांगितले. अतिरिक्त पोलिस आयुक्त मनोज पाटील, पोलिस उपायुक्त हिम्मत जाधव यांच्या प्रयत्नांतून ‘पीटीपी’ ॲपची संकल्पना राबविण्यात येत असून, त्याचा प्रभावी वापर करण्यात येत असल्याचे त्यांनी सांगितले.