मंचरला कालव्यात मोटार कोसळली पुण्यातील तिघांना वाचविण्यात यश

मंचर, ता ९ : परिसरातील डिंभे धरणाच्या उजव्या कालव्यातील पाण्यात शनिवारी रात्री मोटार कोसळली. या मोटारीतील तिघांना पोलिस व नागरिकांनी तातडीने सुखरूप बाहेर काढले.
पवन महेश पाठक (वय ४१), शोभा महेश पाठक (वय ६१, दोघे रा. कोथरूड) आणि पुष्पा महावीर दुबे (वय ७६, मुळ रा. मध्य प्रदेश), हे भीमाशंकर येथून दर्शन घेऊन मोटारीने पुण्याकडे जात होते. मंचर परिसरात ते आले असता डिंभे उजव्या कालव्यात त्यांची मोटार कोसळली. त्यानंतर जवळच असलेल्या मोरडे फूड कंपनीतील कर्मचारी व पोलिस हवालदार तानाजी हगवणे, योगेश रोडे यांनी पाण्यात उतरून मोटारीतील तिघांनाही सुखरूप बाहेर काढले. त्यामुळे मोठी दुर्घटना टळली आहे. क्रेनच्या साह्याने रात्री साडेनऊ वाजता मोटार कालव्याच्या पाण्यातून काढण्यात आली.