जंतनाशक गोळ्यांचे ९० टक्के लक्ष्य पूर्ण

पुणे, ता. ४ : शहरात जंतनाशक गोळ्यांचे ९० टक्के लक्ष्य पूर्ण झाले आहेत. अद्यापही या गोळ्या न घेतलेल्या बालकांच्या पालकांनी महापालिकेच्या रुग्णालयांमध्ये जाऊन त्या घ्याव्यात, असे आवाहन महापालिकेच्या आरोग्य विभागातर्फे केले आहे.
शहरातील १ ते १९ या वयोगटातील मुला-मुलींना घरोघरी जाऊन जंतनाशक गोळ्या वाटपाची मोहीम महापालिकेतर्फे हाती घेण्यात आली. २५ एप्रिल ते २ मेपर्यंत ही मोहीम राबविली. फेब्रुवारी आणि सप्टेंबर महिन्यात दरवर्षी ही मोहीम राबवण्यात येते. गेल्या दोन वर्षांमध्ये करोना उद्रेक असल्याने ही मोहीम राबविण्यात आली नव्हती, असेही विभागातर्फे स्पष्ट करण्यात आले.
मुला-मुलींना जंतसंसर्गाच्या प्रादुर्भावामुळे होणारे कुपोषण, रक्तक्षय या सारखे दुष्परिणाम रोखण्यासाठी राज्य सरकारमार्फत जंतनाशक दिन मोहीम हा उपक्रम दर सहा महिन्यातून एकदा राबवण्यात येतो.
यात महापालिका कार्यक्षेत्रामधील सर्व शाळा, मिशनरी स्कूल, गुरूकुल, संस्कार केंद्र आणि मदरसे येथे शिकणाऱ्या सर्व मुला-मुलींना जंतनाशक गोळ्यांचे मोफत वाटप करण्यात आले.
आशा स्वयंसेविकेच्या माध्यमातून समुदाय स्तरावर १ लाख ७५ हजार ८८६ गोळ्यांचे वाटप केले तर शाळा, महाविद्यालय या संस्था स्तरावर २ लाख ३१ हजार ३२४ गोळ्यांचे वाटप करण्यात आल्याची माहिती सहायक आरोग्य अधिकारी डॉ. वैशाली जाधव यांनी दिली.