पुणेकरांनी अनुभवली सुरांची दिवाळी

पुणे, ता. ३१ : ‘ओ साथी रे’, ‘रंजिश ही सही’, ‘ओ रंगरेज’, ‘तरुण आहे रात्र अजूनी’ यासारख्या अवीट गोडीच्या गाण्यांनी ‘दिवाळी सूरसंध्या’ मैफील सजली. प्रसिद्ध गायक राहुल देशपांडे यांच्या मंत्रमुग्ध करणाऱ्या गायनाने लक्ष्मीपूजनाच्या पूर्वसंध्येला पुणेकरांनी ‘सुरांची दिवाळी’ अनुभवली.

निमित्त होते, ‘सकाळ माध्यम समूहा’तर्फे दिवाळीनिमित्त आयोजित ‘राहुल देशपांडे कलेक्टिव्ह’ या मैफिलीचे. या वेळी राहुल देशपांडे यांनी आपल्या युट्यूब चॅनेलवर सादर केलेली तसेच काही अन्य गाणीही सादर केली. कुशल वादकांच्या साथीने निसर्गरम्य वातावरणात राहुल यांनी रंगवलेली ही मैफील रसिकांनाही अतिशय भावली. प्रत्येक गाण्याला मनमुराद दाद देत रसिकांनी मैफिलीचा आस्वाद घेतला.

राहुल देशपांडे यांनी या वेळी ‘इस मोड से जाते है’, ‘पानी पानी रे’, ‘हम बेवफा’, ‘दिल की तपिश’ आदी गाणी सादर केली. ‘मी वसंतराव’ या चित्रपटातील ‘तेरे दर से’ ही गझल विशेष दाद मिळवून गेली; तर ‘सुन्या सुन्या मैफिलीत माझ्या’ आणि ‘तरुण आहे रात्र अजूनी’ या मराठी गाण्यांनी रसिकांच्या मनाचा ठाव घेतला. गायिका दीप्ती माटे यांनीही ‘ये कहां आ गये हम’ आणि ‘सलोना सा सजन’ ही गाणी सादर केली. गायिका संहिता चांदोरकर यांनी ‘ये मोह मोह के धागे’ आणि ‘क्यू ना बोले मोसे मोहन क्यू’ ही गाणी सादर केली.

याप्रसंगी या कार्यक्रमाचे सहयोगी प्रायोजक असलेल्या ‘लोकमान्य मल्टिपर्पज को-ऑप सोसायटी लि.’चे विभागीय व्यवस्थापक सुशील जाधव, ‘द नेचर - मुकाईवाडी’चे चेअरमन सुशीलकुमार देशमुख आणि ‘सिटी राइज क्राफ्टेड बाय अ‍ॅमनोरा’चे सेल्स हेड अनमोल हवल आदी उपस्थित होते.