पुण्याला दोन महिने पुरेल इतका पाणीसाठा शिल्ल्क
पुणे, ता. १९ ः पुणे शहराला पिण्याच्या पाण्याचा पुरवठा करणाऱ्या खडकवासला प्रकल्पांतील खडकवासला, पानशेत, वरसगाव आणि टेमघर या चार धरणांमध्ये १९ मे अखेर एकूण ७.७५ टीएमसी उपयुक्त पाणीसाठा शिल्लक आहे. यापैकी सुमारे अडीच टीएमसी पाणी पुणे शहरासाठी राखीव आहे. हा पाणीसाठा शहराला येत्या १५ जुलैपर्यंत पुरेल इतका आहे. यामुळे पुणेकरांना यंदाच्या उन्हाळ्यात पाणी टंचाईचा सामना करावा लागणार नाही.
जिल्ह्यातील धरणांमध्ये शिल्लक असलेल्या उपयुक्त पाणीसाठ्याच्या आकडेवारीचा अहवाल जलसंपदा विभागाने प्रसिद्ध केला. यातून ही बाब उघड झाली. पुणे शहराला दरमहा सरासरी सव्वा टीएमसी पाणी आवश्‍यक आहे. त्यामुळे शहराला पाणी पुरवठा करणाऱ्या धरणांमधील एकूण शिल्लक पाणीसाठा, शहरासाठी राखीव कोटा आणि दरमहा आवश्‍यक पाणी यांच्या आकडेवारीची तुलना केल्यास, शहराला किमान दोन महिने पुरेल इतका पाणीसाठा शिल्लक असल्याचे या अहवालातून स्पष्ट झाले आहे.
दरमहा १.३३ टीएमसी पाणी आवश्‍यक
गेल्यावर्षी याच तारखेपर्यंत चार धरणांमध्ये ९.८२ टीएमसी उपयुक्त पाणीसाठा शिल्लक होता. गतवर्षीच्या तुलनेत यंदा पाणीसाठा २.०७ टीएमसी इतका कमी झाल्याचे जलसंपदा विभागातील एका वरिष्ठ अधिकाऱ्याने नाव न छापण्याच्या अटीवर सांगितले. जलसंपदा विभागाकडून पुणे शहराला वर्षाला सुमारे ११.५ टीएमसी पाण्याचा कोटा मंजूर आहे. प्रत्यक्षात वर्षाला सुमारे १६ टीएमसी पाणी वापर पुणे शहराकडून केला जातो. प्रत्यक्ष पाणी वापराच्या संख्येचे समान बारा भाग केल्यास, शहराला दरमहा सुमारे १.३३ टीएमसी पाणी आवश्‍यक असल्याचेही या अधिकाऱ्याने सांगितले.
असे आहे नियोजन
सध्या उपलब्ध असलेल्या पाणीसाठ्यापैकी सुमारे एक टीएमसी पाण्याचे बाष्पीभवन होईल, असे गृहित धरले आहे. उर्वरित ६.७५ पैकी सिंचनासाठी सव्वाचार टीएमसी पाणी राखीव असणार आहे. त्यामुळे शहरासाठी अडीच टीएमसी इतके पाणी राखीव राहिले असल्याचेही या अधिकाऱ्याने सांगितले,
धरणनिहाय शिल्लक उपयुक्त पाणीसाठा (टीएमसीमध्ये)
खडकवासला --- ०.७१
टेमघर --- ०.३५
वरसगाव --- ३.५७
पानशेत --- ३.१२
एकूण उपयुक्त पाणीसाठा --- ७.७५
९.८२
गतवर्षी १९ मे अखेरपर्यंतचा शिल्लक पाणीसाठा
२.०७
गतवर्षीच्या तुलनेत यंदा कमी झालेला पाणीसाठा
२९.१५
चार धरणांतील उपयुक्त पाणीसाठा
१.९१
चार धरणांमधील अचल पाणीसाठा
३१.०६
चार धरणांमधील एकूण साठा
हे ही वाचा
