पुण्यात तापमानाचा पारा वाढतोय

पुणे, ता. ६ ः पुणे शहर आणि परिसरात कमाल तापमानात हळू-हळू वाढ होत आहे. त्यामुळे उन्हाच्या झळा तीव्र होत असून पुणेकरांना उष्णता असह्य होत आहे. पुढील तीन दिवस अशाच प्रकारे उन्हाचा ताप पुणेकरांना सहन करावा लागणार आहे.
शहरात उन्हाचा कडाका चांगलाच वाढला असून यामुळे दुपारच्या वेळी घराबाहेर पडणे अवघड झाले आहे. शुक्रवारी जिल्ह्यातील काही ठिकाणी कमाल तापमान ४० अंश होते. शहरात ३९.३ अंश सेल्सिअस तर लोहगाव येथे ४० अंश सेल्सिअस इतक्या कमाल तापमानाची नोंद झाली. तर जिल्ह्यातील सर्वाधिक कमाल तापमान तळेगाव ढमढेरे येथे ४२.९ अंश सेल्सिअस होते. येत्या सोमवारपर्यंत (ता. ९) पुणे व परिसरात तापमान ४० अंशांपर्यंत नोंदले जाऊ शकते. त्यामुळे उन्हाच्या झळांचा त्रास कायम राहणार आहे. हवामानशास्त्र विभागाने दिलेल्या माहितीनुसार मंगळवारपासून (ता. १०) शहर आणि परिसरात अंशतः ढगाळ वातावरण होऊ शकते. यामुळे कमाल तापमानात पुन्हा घट पाहायला मिळेल.