स्वागत समारंभातून लांबविले पाच लाख

पुणे, ता. ७ : क्वीन्स गार्डन परिसरातील रेसिडेन्सी क्‍लब येथे विवाह सोहळ्यानिमित्त आयोजित केलेल्या स्वागत समारंभात वधुच्या भावाकडील साडे पाच लाख रुपयांची रोकड व दागिने असलेली बॅग चोरट्यांनी लांबविली. ही घटना मंगळवारी (ता.३) रात्री साडेदहाच्या सुमारास क्वीन्स गार्डन परिसरातील रेसिडेन्सी क्‍लब येथे घडली.
याप्रकरणी एका नामांकित संगणक अभियंता असलेल्या वधुच्या ४२ वर्षीय भावाने कोरेगाव पार्क पोलिस ठाण्यात फिर्याद दिली. स्वागत समारंभ सुरू असताना फिर्यादीस वधु-वरासमवेत फोटो काढण्यासाठी नातेवाइकांनी स्टेजवर बोलाविले. त्यावेळी त्यांनी त्यांच्याकडील बॅग तेथील एका खुर्चीवर ठेवली. बॅगेकडे कोणाचेही लक्ष्य नसल्याची संधी साधून चोरट्यांनी बॅग चोरून नेली. त्यानंतर फिर्यादी फोटो काढून पुन्हा खुर्चीजवळ आले. त्यावेळी त्यांची बॅग चोरीला गेल्याचे त्यांच्या निदर्शनास आले. त्यांनी याबाबत तत्काळ कोरेगाव पार्क पोलिस ठाण्यात फिर्याद दिली. या प्रकरणाचा तपास पोलिस उपनिरीक्षक अमोल घोडके करीत आहे