विवाह सोहळ्यातून दिव्यांगांचे जुळले रेशीमबंध

पुणे, ता. ७ ः सनई-चौघडे आणि बँडच्या तालावर नाचणारी वऱ्हाडी मंडळी... अक्षतांच्या माध्यमातून शुभाशिर्वाद देण्यासाठी जमलेले वधू-वरांचे दृष्टिहीन व दिव्यांग बांधव, अशा आनंददायी वातावरणात दृष्टिहीन व दिव्यांग वधू-वरांचे रेशीमबंध जुळले. डोळ्याने दिसत नसले आणि आधाराशिवाय जरी चालता येत नसले, तरी आपले नातेवाईक किंवा अपेष्टा नसूनही विवाह सोहळ्याकरीता आलेल्या मान्यवरांचे भरभरून प्रेम पाहून आणि आपुलकीने दिलेल्या शुभेच्छांनी वधू-वरांच्या डोळ्याच्या कडा आनंदाश्रूंनी पाणावल्या.
निमित्त होते, शुक्रवार पेठेतील सेवा मित्र मंडळ ट्रस्ट व लुई ब्रेल अंध अपंग कल्याण संस्थेतर्फे आर्थिकदृष्टया दुर्बळ असलेल्या दृष्टिहीन व दिव्यांग मुला-मुलींच्या अनोख्या विवाहसोहळयाचे. यावेळी प्रीती गाडे व दत्तात्रेय जाधव आणि राधा बडीगरे व रामलिंग चलवादी या दोन दिव्यांग जोडप्यांचा विवाह सोहळा उत्साहात पार पडला. संस्थेचे अरुण केंद्रे यांनी त्यांच्या विवाहासाठी विशेष प्रयत्न केले.
या प्रसंगी वधू-वरांना शुभाशिर्वाद देण्यासाठी यशदाचे अतिरिक्त महासंचालक विशाल सोळंकी, माजी विशेष पोलिस महानिरीक्षक चंद्रशेखर दैठणकर, विद्याधर अनास्कर, एअर मार्शल भूषण गोखले (निवृत्त), आमदार माधुरी मिसाळ, हेमंत रासने आदी उपस्थित होते. शुभांगी व चारुदत्त आफळे, दीपा व सचिन ससाणे यांनी कन्यादान केले. कार्यक्रमाचे संयोजन अध्यक्ष जगदीश शेटे, अमर लांडे, विक्रांत मोहिते, वैभव वाघ, उमेश कांबळे, अजय पंडित, कुणाल जाधव, साहिल आंबेडकर, सदाशिव कुंदेन, प्रशांत मते आदींनी केले.