जुन्या वादातून खुनाचा प्रयत्न; आरोपींना अटक

पुणे, ता. ११ ः जुन्या भांडणाच्या वादातून एकाच्या घरात घुसून टोळक्‍याने त्याच्यावर कोयत्याने वार करून खुनाचा प्रयत्न केला. या गुन्ह्यातील तीन आरोपींना शिवाजीनगर पोलिसांनी बेड्या ठोकल्या.

रणजित विलास परदेशी, शेरू ऊर्फ श्रीनाथ विलास परदेशी, चिराग महेश जोशी (सर्व रा. जोशी आळी, शिवाजीनगर गावठाण) अशी अटक केलेल्यांची नावे आहेत. याप्रकरणी सागर नंदकुमार दळवी (रा. शिवाजीनगर गावठाण) यांनी शिवाजीनगर पोलिस ठाण्यात फिर्याद दिली. फिर्यादी सागर दळवी व आरोपींची पूर्वी भांडणे झाली होती. त्या रागातूनच त्यांनी तीन मार्च रोजी दुपारी साडेतीन वाजण्याच्या सुमारास फिर्यादीच्या घरात घुसून त्यांच्या हातातील पालघन व कोयत्याने डोक्‍यावर वार केले होते. या घटनेत दळवी हे गंभीर जखमी झाले होते. याप्रकरणी फिर्याद दाखल झाल्यानंतर पोलिसांकडून आरोपींचा शोध सुरू होता. आरोपी शिवाजीनगर येथील कामगार पुतळ्याजवळ आले असल्याची माहिती मिळाली. त्यानुसार, पोलिसांनी त्यांना अटक केली.