वंचित बहुजन आघाडीच्या कार्यालयाची तोडफोड

पुणे, ता. १० ः राजकीय पक्षाच्या कार्यालयासमोर सीसीटीव्ही बसविण्यास विरोध करीत दोघांनी कार्यालयासह एका दुचाकीची तोडफोड करीत धमकी दिली. ही घटना रविवारी रात्री पावणे आठ वाजण्याच्या सुमारास वानवडी येथील रामटेकडी परिसरात घडला.

महादेव बसवराज पाटील (वय ३६, रा. रामटेकडी), तौसिफ रियाज शेख (वय १८) अशी अटक केलेल्यांची नावे आहेत. याप्रकरणी किसन आदमाने (वय ३३, रा. हडपसर) यांनी वानवडी पोलिस ठाण्यात फिर्याद दाखल केली आहे. पोलिसांनी दिलेल्या माहितीनुसार, फिर्यादी किसन आदमाने हे रविवारी रात्री पावणे आठ वाजण्याच्या सुमारास वंचित बहुजन आघाडीच्या कार्यालयासमोर संजय घोडके यांच्यासोबत गप्पा मारत बसले होते. त्यावेळी तेथील वस्तीत राहणारे महादेव व तौसिफ कार्यालयासमोर आले. त्यांनी फिर्यादीस ‘इथे सीसीटीव्ही लावायचे नाहीत. नाहीतर तुझा कार्यक्रम करून टाकेन’ अशी धमकी दिली. त्यानंतर त्यांनी संबंधित कार्यालयाची तोडफोड करून फिर्यादीच्या दुचाकीही कोयत्याने मारून तिची तोडफोड केली. तसेच कोयता हवेत फिरवून ‘माझ्या नादाला लागला, तर तुझा इथंच गेम करून टाकेन’ अशी धमकी दिली. याप्रकरणी पोलिसांनी दोघांना अटक केली असून तिघांचा शोध घेतला जात आहे. या प्रकरणाचा तपास पोलिस उपनिरीक्षक माया गावडे करीत आहेत.