फोटो व्हायरल करण्याची धमकी देणाऱ्यास अटक

पुणे, ता. १० : टिकटॉकद्वारे ओळख झालेल्या तरुणीशी मैत्रीचे संबंध निर्माण झाल्यानंतर तिने लग्नास नकार दिल्याने तरुणाने तिचे फोटो कुटुंबीयांना पाठविले. तसेच तरुणीचे फोटो समाजमाध्यमांवर प्रसारित करण्याची धमकी दिली. या प्रकरणाची गांभीर्याने दखल घेत चंदननगर पोलिसांनी तरुणास बेड्या ठोकल्या. अब्दुल वहीद शेख (वय २०, रा. माळीवाडा, पाचपीर चावडी, नगर) असे अटक केलेल्या संशयित आरोपीचे नाव आहे. या प्रकरणी १९ वर्षीय तरुणीने चंदननगर पोलिस ठाण्यात फिर्याद दिली. दरम्यान, तरुणीने या प्रकरणाबाबत सायबर पोलिसांकडे तक्रार दिली होती. सायबर पोलिसांनी या प्रकरणाची चौकशी करून चंदननगर पोलिसांकडे हे प्रकरण वर्ग केले. त्यानुसार, चंदननगर पोलिसांनी याप्रकरणी शेख याच्याविरुद्ध तत्काळ गुन्हा दाखल केला.