राजीवनगर येथे नवविवाहितेची आत्महत्या

पुणे, ता. ११ : माहेरहून दुचाकी, सोन्याचे दागिने आणण्यासाठी पतीकडून होणाऱ्या छळास कंटाळून एका १९ वर्षीय नवविवाहितेने गळफास घेऊन आत्महत्या केली. ही घटना विमाननगर परिसरातील राजीवनगरमध्ये घडली.
संजना मनीष त्रिभुवन असे आत्महत्या केलेल्या विवाहितेचे नाव आहे. या प्रकरणी संजनाची आई योगिता त्रिभुवन (रा. वानवडी) यांनी फिर्याद दिली आहे. त्यावरून वानवडी पोलिसांनी पती सागर देविदास पंडित (वय २२, रा. राजीवनगर, विमाननगर) आणि अन्य दोन नातेवाईक महिलांविरुद्ध गुन्हा दाखल केला आहे. दुचाकी, सोन्याची अंगठी आणि चेनसाठी संजना हिला सासरी मारहाण केली जात होती. शारीरिक आणि मानसिक त्रास देवून पत्नीला आत्महत्येस प्रवृत्त केल्याप्रकरणी पोलिसांनी पती सागर पंडित याला अटक केली आहे. पुढील तपास पोलिस उपनिरीक्षक ए. आर. गांधले करीत आहेत.