मोफत पोवाडा प्रशिक्षण वर्गाचे उद्‍घाटन

पुणे, ता. ११ ः ‘‘अनेक वर्षांपासून पोवाडयातून समाजप्रबोधनाचे काम सुरू आहे. शाहीर आपल्या पोवाडयातून जे सांगतात, ते त्यांनी अनुभवायला हवे. पोवाडा सादर करताना दृश्यकलेलाही अनन्यसाधारण महत्त्व आहे’’, असे मत कथक नृत्यांगना पं. मनिषा साठे यांनी व्यक्त केले.
‘शाहीर हिंगे लोककला प्रबोधिनी, पुणे’ व डेक्कन एज्युकेशन सोसायटी यांच्यातर्फे आयोजित मोफत पोवाडा प्रशिक्षण वर्गाच्या उद्‍घाटनप्रसंगी त्या बोलत होत्या. यावेळी ब्रिगेडियर (निवृत्त) प्रसाद जोशी, डी. ई. सोसायटीचे डॉ. शरद आगरखेडकर, आचार्य शाहीर हेमंतराजे मावळे आदी उपस्थित होते. यंदा पोवाडा वर्गामध्ये भारतीय स्वातंत्र्याचा अमृतमहोत्सव साजरा करण्यात येत असून आचार्य शाहीर हेमंतराजे मावळे हे सलग २५ वर्षे विद्यार्थ्यांना प्रशिक्षण देत आहेत. प्रा. संगीता मावळे यांनी सूत्रसंचालन केले.