मुलीच्या बदनामीप्रकरणी एकास अटक

पुणे, ता. १२ : अल्पवयीन मुलीवर बलात्कार करून तिचे अश्लील फोटो व्हॉट्सअ‍ॅपच्या स्टेटसवर ठेऊन बदनामी केल्याप्रकरणी उत्तमनगर पोलिसांनी तरुणाला अटक केली. विशेष न्यायाधीश एस. पी. पोंक्षे यांनी त्याला १६ मेपर्यंत पोलिस कोठडीत ठेवण्याचा आदेश दिला. या प्रकरणी पोलिसांनी २४ वर्षीय तरुणाला अटक केली आहे. याबाबत १४ वर्षीय मुलीच्या पालकांनी फिर्याद दिली आहे. ऑगस्ट २०२१ ते १२ मे २०२२ या कालावधीत ही घटना घडली. मुलगी अल्पवयीन असल्याचे माहीत असताना देखील त्याने घरी कोणी नसताना तिच्याबरोबर शारीरिक संबंध ठेवले. तसेच अश्लील फोटो काढून ते व्हॉट्सअ‍ॅपच्या स्टेटसवर ठेऊन तिची बदनामी केली, असे फिर्यादीत नमूद केले आहे. गुन्ह्याचा पुढील तपास करण्यासाठी आरोपीला पोलिस कोठडी देण्याची मागणी सरकारी वकील शुभांगी देशमुख यांनी केली.