चोरीप्रकरणी एका सराईत चोरट्याला अटक

पुणे, ता. १२ : घराचे कुलूप तोडून लॅपटॉप, मोबाईल, राऊटर, एअर पॉड, हेडफोन असा ९६ हजार ५०० रुपयाचा मुद्देमाल चोरल्याप्रकरणी एका सराईत चोरट्याला फरासखाना पोलिसांनी अटक केली. न्यायालयाने त्याला १७ मेपर्यंत पोलिस कोठडी सुनावली. या चोरट्याने पुणे, औरंगाबादसह इतर जिल्ह्यांमध्ये घरफोडी व चोरीचे गुन्हे केल्याची कबुली तपासात दिली. सीसीटीव्ही चित्रीकरणाच्या मदतीने पोलिसांनी त्याला जेरबंद केले. प्रज्वल गणेश वानखेडे ऊर्फ रेवणन्नाथ (वय २५, रा. औरंगाबाद) असे आरोपीचे नाव आहे. याबाबत कसबा पेठ परिसरात राहणाऱ्या ३७ वर्षाच्या व्यक्तीने फिर्याद दिली. त्यानुसार, आरोपीवर चोरी व घरफोडीचा गुन्हा दाखल केला. ही घटना ९ मे रोजी सकाळी पावणे अकरा ते दीडच्या सुमारास कसबा पेठ परिसरात घडली. आरोपीने चोरी करण्यासाठी विविध दुचाकींचा वापर केला असून, सर्व मुद्देमाल औरंगाबाद व इतर जिल्ह्यांमध्ये ठेवला आहे. या चोऱ्यांचा तपास करून मुद्देमाल व दुचाकी जप्त करायच्या आहेत. आरोपीचे अन्य साथीदार आहेत का, यासह गुन्ह्याचा तपास करण्यासाठी आरोपीला पोलिस कोठडी देण्याची मागणी सहायक सरकारी वकील रेणुका देशपांडे यांनी केली.