प्रलंबित मागण्यासाठी स्टेशन मास्टर रजेवर जाणार

पुणे, ता. १३ : रेल्वेतील खासगीकरण बंद करा, स्टेशन मास्टरांच्या रिक्त तागा तत्काळ भरा, स्टेशन मास्टरांना सुरक्षा व ताण भत्ता द्या, नवीन पेन्शन योजना रद्द करून जुनी पेन्शन योजना लागू करा, रात्रपाळी सिलींग मर्यादा ४३ हजार ६०० रुपयांचा आदेश रद्द करून एक जुलै २०१७ पासूनचा रिकवरी आदेश परत घ्या, एम. ए. सीपी. चा फायदा एक जानेवारी २०१६ पासून द्या, आदी विविध मागण्यांकरिता देशभरातील ३५ हजार स्टेशन मास्टर ३१ मे रोजी एक दिवसाची सामूहिक रजा घेणार आहे, अशी माहिती ऑल इंडिया स्टेशन मास्टर असोसिएशनचे राष्ट्रीय अध्यक्ष धनंजय चंद्रात्रे यांनी शुक्रवारी पत्रकार परिषदेत दिली.
चंद्रात्रे म्हणाले, ‘‘रेल्वे स्टेशन मास्टरांच्या प्रलंबित मागण्या पूर्ततेसाठी यापूर्वी पाच टप्प्यात शांततेच्या मार्गाने आंदोलन करूनही अद्याप रेल्वे बोर्डाने गांभीर्याने आमच्या मागण्यांचा विचार केला नाही. अधिकाऱ्यांना ई-मेल पाठविण्यात आले. नाईट ड्यूटीला असणाऱ्या स्टेशन मास्तरांनी मेणबत्त्या पेटविल्या, एक आठवडा काळा बिल्ला लावून आंदोलन केले, एक दिवसाचा उपवास केला. इतके करूनही रेल्वे प्रशासनाने मागण्याची दखल घेतली नाही. येत्या काळात रेल्वे प्रशासनाने योग्य प्रकारची भूमिका न घेतल्यास आंदोलन अधिक तीव्र करण्यात येईल, असा इशारा देण्यात आला. या पत्रकार परिषदेस विभागीय सचिव विश्वजीत किर्तीकर, मध्य रेल्वे सचिव एस. के. मिश्रा, कार्याध्यक्ष अजय सिन्हा, स्टेशन प्रबंधक दिनेश कांबळे आदी उपस्थित होते.