ग्रामसेवकांच्या प्रशिक्षणासाठी करार करणार

पुणे, ता. २६ ः मांजरी येथील ग्रामसेवक प्रशिक्षण संस्था आणि मुंबईतील टाटा इन्स्टिट्यूट आॅफ सोशल सायन्स (टाटा समाज विज्ञान संस्था) सामंजस्य करार करण्यास विभागीय आयुक्त सौरभ राव यांच्या अध्यक्षतेखाली झालेल्या नियामक मंडळाच्या बैठकीत एकमताने मान्यता देण्यात आली. यामुळे मांजरी येथील या प्रशिक्षण संस्थेत ग्रामसेवकांसोबतच सामान्य नागरिकांनाही प्रशिक्षण घेण्याची सुविधा उपलब्ध होणार आहे. मांजरी येथे प्रशिक्षण घेणाऱ्यांना टाटा सामाजिक संस्थेचे प्रमाणपत्र मिळावे, या उद्देशाने हा निर्णय घेतला आहे.
नियामक मंडळाच्या या निर्णयानुसार ग्रामसेवक प्रशिक्षण केंद्राच्यावतीने टाटा समाज विज्ञान संस्थेला पत्र पाठविण्यात येणार आहे. टाटा समाज विज्ञान संस्थेने प्रशिक्षणार्थींना त्यांचे प्रशिक्षण प्रमाणपत्र देण्याचे मान्य केले तरच हा सामंजस्य करार करावा, असाही निर्णय नियामक मंडळाच्या बैठकीत घेण्यात आला. मांजरी येथील ग्रामसेवक प्रशिक्षण संस्थेत पुण्यासह नगर आणि सोलापूर जिल्ह्यातील ग्रामसेवकांना प्रशिक्षण देण्यात येते. मात्र सामंजस्य करारामुळे सर्वसामान्य नागरिकांनाही या संस्थेत प्रशिक्षण घेण्याचा मार्ग मोकळा होऊ शकणार असल्याचे पुणे जिल्हा परिषदेचे मुख्य कार्यकारी अधिकारी आणि या संस्थेच्या नियामक मंडळाचे सदस्य आयुष प्रसाद यांनी सांगितले.

नगर, सोलापूर सीईओंना सदस्यत्व
या प्रशिक्षण केंद्रात पुणे, नगर, सोलापूर या तीन जिल्ह्यातील ग्रामसेवकांना प्रशिक्षण देण्यात येते. परंतु आतापर्यंत केवळ पुणे जिल्हा परिषदेच्या मुख्य कार्यकारी अधिकाऱ्यांनाच या नियामक मंडळाचे सदस्यत्व मिळाले आहे. पुण्याच्या धर्तीवर नगर व सोलापूर जिल्हा परिषदेच्या मुख्य कार्यकारी अधिकाऱ्यांना या नियामक मंडळाचे सदस्य करण्याचा ठराव या बैठकीत मांडण्यात आला. सौरभ राव यांनी या ठरावास मंजुरी दिली. त्यामुळे आता नगर व सोलापूरचे सीईओ हे या नियामक मंडळाचे सदस्य झाले आहेत.