शिवणे नदीपात्रात अवैध वाळू उपसा प्रकरणी धडक कारवाई

पुणे, ता. ५ : शिवणे येथे नदीपात्रात जेसीबीने अवैध वाळू उपसा करणाऱ्यांविरोधात हवेली तहसीलदारांनी गुरुवारी (ता. ४) रात्री धडक कारवाई केली. वाळू माफियांकडून जेसीबी आणि ट्रॅक्टर ट्रॉली जप्त केली.
शिवणे येथे नदीपात्रात गुरुवारी रात्री जेसीबी मशिन आणि ट्रॅक्टर ट्रॉलीमधून वाळूची चोरी सुरू होती. याबाबत काही सामाजिक कार्यकर्त्यांनी हवेलीच्या तहसीलदार तृप्ती कोलते पाटील यांच्याकडे तक्रार केली. ही माहिती मिळताच कोलते पाटील यांनी तातडीने रात्री भर पावसात धडक कारवाई करून वाळू चोरी करणारे एक जेसीबी आणि ट्रॅक्टर ट्रॉली जप्त केली. याप्रकरणी वारजे पोलिस ठाण्यामध्ये गुन्हा दाखल केला आहे.
जेसीबी, ट्रॅक्टर ट्रॉली, चाळण यांच्यासह मुद्देमाल जप्त करून वारजे पोलिसांच्या ताब्यात देण्यात आला आहे, असे हवेली तहसीलदार कोलते पाटील यांनी सांगितले.