माजी नगरसेवक जगताप यांच्याविरोधात गुन्हा

पुणे, ता. ३ : अन्नधान्य वितरण कार्यालयातील निरीक्षक महिला अधिकाऱ्याशी हुज्जत घालून सरकारी कामात अडथळा आणल्याच्या आरोपाखाली राष्ट्रवादी काँग्रेस पक्षाचे माजी नगरसेवक सुभाष जगताप यांच्याविरोधात गुन्हा दाखल करण्यात आला.

या प्रकरणी अन्नधान्य वितरण कार्यालयातील एका पुरवठा निरीक्षक महिला अधिकाऱ्याने समर्थ पोलिस ठाण्यात फिर्याद दिली आहे. जगताप त्यांच्या प्रभागातील नागरिकांचे शिधापत्रिकेचे काम घेऊन जुन्या जिल्हा परिषद कार्यालयातील अन्नधान्य वितरण कार्यालयात आले होते. त्यावेळी महिला अधिकाऱ्याशी हुज्जत घालून नोकरी घालविण्याची धमकी दिली. जगताप यांनी कार्यालयातील सहकाऱ्यांसमोर अपमानित केले, असे महिला अधिकाऱ्याने फिर्यादीत नमूद केले आहे. सरकारी कामात अडथळा तसेच विनयभंग केल्याप्रकरणी जगताप यांच्या विरोधात गुन्हा दाखल करण्यात आला. या प्रकरणी जगताप यांना संपर्क साधण्याचा प्रयत्न केला असता, तो होऊ शकला नाही.