निवडणूक माहितीसाठी संकेतस्थळ

पुणे, ता. १९ : राज्यातील सर्व सहकारी संस्थांच्या निवडणुकांमध्ये मतदार याद्यांचे अधिक्षण, निर्देशन व नियंत्रण करणे व सर्व सहकारी संस्थांच्या निवडणुका योग्य रीतीने पार पाडण्यासाठी राज्य सहकारी निवडणूक प्राधिकरणाकडून संकेतस्थळ सुरू करण्यात आले आहे. या संकेतस्थळाच्या माध्यमातून सहकारी संस्था आणि कृषी उत्पन्न बाजार समित्या यांचे सभासद, निवडणूक कामकाजाच्या विविध टप्प्यांची माहिती उपलब्ध करून देण्यात आली आहे.
२५० व त्या खालील सभासद संख्या असलेल्या सहकारी संस्था वगळून राज्यातील सर्व प्रकारच्या सहकारी संस्था तसेच, सर्व कृषी उत्पन्न बाजार समित्या यांच्या निवडणुकीचे कामकाज या प्राधिकरणामार्फत करण्यात येते. या संस्थांसाठी प्राधिकरणाची संरचना, सहकारी संस्था व कृषी उत्पन्न बाजार समित्यांच्या निवडणुकांची कार्यपद्धती, त्या संबंधित अद्ययावत कायदे व नियम, सहकारी निवडणूक अधिकाऱ्यांची हस्त-पुस्तिका, राज्यातील जिल्हा सहकारी निवडणूक अधिकारी तसेच तालुका सहकारी निवडणूक अधिकारी यांची संपर्क यादी, प्रत्येक जिल्ह्याच्या नामिकेतील क तसेच ड वर्गातील सहकारी संस्थांकरिता निवडणूक निर्णय अधिकारी यांची यादी, नागरिकांची सनद, माहिती अधिकार कायदा २००५ अंतर्गत स्वयं-प्रकटन, वारंवार विचारले जाऊ शकणारे प्रश्न, महत्त्वाचे नमुने, सांख्यिकी माहिती इत्यादी माहिती संकेतस्थळावर उपलब्ध करून देण्यात आली आहे. यामुळे सहकार, कृषी, पणन क्षेत्रामध्ये काम करणारे तज्ज्ञ, अधिकारी आणि कर्मचारी, लोकप्रतिनिधी, सर्वसामान्य नागरिक आणि या क्षेत्रातील अभ्यासकांसाठी ही माहिती उपयुक्त ठरणार आहे. तसेच सहकारी निवडणूक प्राधिकरणाच्या संकेतस्थळावर राज्य सहकारी निवडणूक प्राधिकरणाशी निगडित असलेले सहकार आयुक्त व निबंधक सहकारी संस्था, साखर आयुक्त, पणन संचालक, दुग्धव्यवसाय विकास आयुक्त, वस्त्रोद्योग आयुक्त, उद्यम विकास आयुक्त, मत्स्यव्यवसाय आयुक्त, गृहनिर्माण विभाग या संकेतस्थळाची माहिती देखील त्याला लिंक करण्यात आली आहे.

माहिती तंत्रज्ञानाची मदत घेण्यात आली असून राज्य सहकारी निवडणूक प्राधिकरण, महाराष्ट्र राज्य यांचे https://scea.maharashtra.gov.in/ संकेतस्थळ कार्यान्वित झाले आहे. संकेतस्थळाला नागरिकांसह सहकारी संस्थांचा चांगला प्रतिसाद मिळत आहे.
- डॉ. जगदीश पाटील, आयुक्त, राज्य सहकारी निवडणूक प्राधिकरण