‘लोकमान्य’तर्फे सीए, डॉक्टरांचा सन्मान

पुणे, ता. ५ : आर्थिक आणि आरोग्य क्षेत्रात मोलाचा वाटा उचलणाऱ्या सीए आणि डॉक्टर हे दोघेही देशसेवा व मानवसेवेचा आदर्श समाजासमोर घालून देत आलेले आहेत. त्यांच्या या कार्याला मानवंदना म्हणून पुणे महानगराबरोबरच सातारा, वाई, उंब्रज, कऱ्हाड, नगर, औरंगाबाद येथील कार्यरत असणाऱ्या सीए व डॉक्टरांचा सन्मान लोकमान्य सोसायटीच्या वतीने करण्यात आला. ‘सीए व डॉक्टर्स डे’निमित्त एक जुलै रोजी लोकमान्य सोसायटीच्या विविध शाखांतर्फे त्यांच्या निवासस्थानी जाऊन हा सत्कार करण्यात आला. लोकमान्य सोसायटीच्या ४५ हून अधिक शाखांच्या माध्यमातून पाचशे सीए व डॉक्टर्स यांना पुस्तकांचा संच आणि सन्मानपत्र देण्यात आले. सन्मानमूर्तींनी लोकमान्य सोसायटीच्या या उपक्रमाचे कौतुक केले. या सन्मानामुळे आम्हाला पुढील कार्यासाठी प्रेरणा मिळाली आहे, अशी प्रतिक्रिया त्यांनी व्यक्त केली.