शिवसेनेच्या खासदारांचा भाजपसोबत राहण्याचा आग्रह

पिंपरी, ता. १२ : ‘शिवसेनेने भाजपसोबत राहावे’, असा आग्रह शिवसेना खासदार संजय राऊत वगळता लोकसभेतील शिवसेनेच्या १८ पैकी १६ व राज्यसभेतील दोन खासदारांनी पक्षप्रमुख उद्धव ठाकरे यांच्याकडे धरला आहे, असे विश्वसनीय वृत्त कळते. भाजपसोबतचे संबंध ताणले जाऊ नयेत, यासाठी राष्ट्रपतीपदाच्या ‘एनडीए’च्या उमेदवार द्रौपदी मुर्मू यांना शिवसेनेने पाठिंबा दिला आहे.

शिवसेना खासदारांची उद्धव ठाकरे यांच्याशी सोमवारी (ता. ११) ‘मातोश्री’ येथे बैठक झाली. यावेळी पाच खासदार अनुपस्थित होते. मात्र, मुख्यमंत्री एकनाथ शिंदे यांच्यासोबत असलेल्या खासदार भावना गवळी व श्रीकांत शिंदे यांच्या व्यतिरिक्त उर्वरित लोकसभा व राज्यसभेतील खासदारांपैकी एकमेव संजय राऊत वगळता सर्वच खासदारांची भाजपबरोबर राहण्याची प्रबळ इच्छा आहे, असे शिवसेनेच्या एका खासदारांनी नाव न सांगण्याच्या अटीवर सांगितले.

भाजपसोबत भवितव्य...
भाजपसोबत राहिल्यानेच आपण निवडून आल्याचे बहुतांश शिवसेनेच्या खासदारांना वाटते. पंतप्रधान नरेंद्र मोदी यांच्या चेहऱ्यामुळे भविष्यातही भाजपसोबत राजकीय भवितव्य आहे. आपण राष्ट्रवादी कॉँग्रेससोबर राहू नये, त्यांना केंद्रातील राजकारणाशी देणे-घेणे नाही. ते केव्हाही भाजपसोबत जुळवून घेतात. परिणामी आपले हित भाजपसोबत राहण्यातच आहे. त्यामुळे खासदारांच्या आग्रहास्तव राष्ट्रपतीपदाच्या ‘एनडीए’च्या उमेदवार द्रौपदी मुर्मू यांना पाठिंबा दिल्याचे विश्वसनीय वृत्त आहे.