मार्केट यार्डातील व्यापाऱ्याची साडेआठ कोटींची फसवणूक

पुणे, ता. १५ ः खाद्यतेल खरेदीसाठी साडेआठ कोटी रुपये देऊनही तेलाचा पुरवठा न करता मार्केट यार्डातील एका व्यापाऱ्याला दुसऱ्या खाद्यतेल विक्रेत्या व्यापाऱ्याने तब्बल साडेआठ कोटींना फसविले. याप्रकरणी मार्केट यार्ड पोलिस ठाण्यात गुन्हा दाखल झाला.

राज ललित बकोरिया (रा. शीतल प्लाझा, मॉडेल कॉलनी) असे गुन्हा दाखल झालेल्या व्यक्तीचे नाव आहे. याप्रकरणी यश नरेंद्र मित्तल (रा. मुकुंदनगर, स्वारगेट) यांनी मार्केट यार्ड पोलिस ठाण्यात फिर्याद दिली. मित्तल यांचा मार्केट यार्डातील भुसार बाजारात खाद्यतेल विक्रीचा व्यवसाय आहे. मित्तल यांनी खाद्यतेल खरेदीसाठी बकोरिया यांना गेल्या वर्षी आठ कोटी ५४ लाख रुपये दिले होते. रक्कम दिल्यानंतर बकोरिया यांनी मित्तल यांना खाद्यतेलाचा पुरवठा केला नाही. त्यानंतर मित्तल यांनी त्यांच्याकडे पैसे मागितले. परंतु, पैसे देण्यासही त्यांनी नकार दिला. पैशांबाबत त्यांच्याकडे सातत्याने पुरवठा करूनही बकोरीया यांनी प्रतिसाद दिला नाही. आपली फसवणूक झाल्याचे लक्षात आल्यानंतर मित्तल यांनी बकोरीयाविरुद्ध फसवणुकीचा गुन्हा दाखल केला.