मुलाखतीतून उलगडला चिंटूचा प्रवास

कोथरुड, ता. १७ ः ‘‘चिंटू येताना एकटा येत नाही. त्याच्यासोबत त्याचे कुटूंब, मित्र मंडळी व सभोवतालचे लोकही येतात. चिंटूमध्ये प्रत्येकवेळी विनोदच द्यायचा असे आम्ही कधीच केले नाही. बरेचदा तरल भावनांचा वापर केला आहे,’’ या शब्दांत सुप्रसिध्द व्यंगचित्रकार चारुहास पंडीत चिंटूचा प्रवास उलगडला.
भावार्थ पुस्तकालयत झालेल्या शब्दयात्री कार्यक्रमातील मुलाखतीत पंडीत बोलत होते. प्रसन्न करंदीकर यांनी त्यांची मुलाखत घेतली. चारुहास पंडीत म्हणाले की, आता कॉमिक्समध्ये खुप छान प्रयोग होतात. परंतु आत्ता जे व्यंगचित्र दिसतात ते पाश्चिमात्य वाटतात. चिंटू मात्र अगदी आपल्या घरातला वाटतो. वर्तमानपत्रात ३ कॉलम बाय ५ हा आपला कॅनव्हास आहे. त्यामध्ये लोकांना जास्तीत जास्त खिळवून ठेवायचे असते. त्यासाठी मी व प्रभाकर वाडेकर मिळून खुप वेगवेगळे प्रयोग केले. चिंटू न दाखवता सुध्दा चिंटू असल्याचा फील येईल असे सुध्दा चित्र काढले.
टीडब्ल्यूजे- द सोशल रिफॉर्मचे ऋषीकेश पाटील यावेळी उपस्थित होते.