ज्येष्ठ ज्योतिषांसह संस्थांचा सत्कार

पुणे, ता. ९ : ज्योतिष संशोधन केंद्र (जळगाव) तर्फे आयोजित अखिल भारतीय ज्योतिष अधिवेशनाच्या दुसऱ्या दिवशी गुरुवारी (ता. ९) या क्षेत्रातील ज्येष्ठ ज्योतिषांसह संस्थांचा त्यांच्या दीर्घ योगदानाबद्दल सत्कार करण्यात आला.
पंचांगकर्ते मोहन दाते, विजय जकातदार, उज्वल पावले, नंदकिशोर जकातदार, दर्शन शुक्ल, पुंडलिक दाते आणि शुभांगिनी पांगारकर यांच्या उपस्थितीत समारोप झाला. दुपारच्या सत्रात चंद्रकांत शेवाळे यांना ज्योतिश्री जीवन गौरव पुरस्कार, डॉ. नरेंद्र सहस्रबुद्धे यांना ज्योतिश्री जीवन गौरव पुरस्कार, चंद्रकला जोशी यांना ज्योतिश्री आदर्श महिला ज्योतिर्विद पुरस्कार, देवदत्त जोशी यांना ज्योतिश्री पुरस्कार आणि भरत सटकर यांना ज्योतिश्री पुरस्कार हा ज्योती जोशी यांच्या हस्ते प्रदान करण्यात आला.
अभिजित प्रतिष्ठान, दि इन्स्टिट्यूट ऑफ डेस्टिनी मॅनेजमेंट मुंबई आणि प्रा. रमणलाल शहा सर्च ॲण्ड रिसर्च ज्योतिष सेंटर, सातारा यांच्या सहकार्याने या अधिवेशनाचे आयोजन केले. महाराष्ट्रातील दहा ज्योतिष संस्थांचा सक्रिय सहभाग यात होता. ज्योती जोशी, डॉ. मकरंद सरदेशमुख, विजय जकातदार, प्रदीप पंडित, राजेश शर्मा, सुनील पुरोहित, देवब्रत बूट, डॉ. संजीवनी मुळे, डॉ. प्रसन्न मुळ्ये यांनी दुसऱ्या दिवशी विविध विषयांवर मार्गदर्शन केले.