धायरीत तरुणावर शस्त्राने वार

पुणे, ता. १५ : सिंहगड रस्ता परिसरातील धायरी भागात पूर्ववैमनस्यातून टोळक्याने दहशत माजवून एका तरुणावर शस्त्राने वार केल्याची घटना मंगळवारी (ता. १४) घडली. टोळक्याने परिसरातील वाहनांची तोडफोड केली.
या घटनेत गजानन राठोड (वय २९, रा. धायरी) जखमी झाला असून त्याने याबाबत सिंहगड पोलिस ठाण्यात फिर्याद दिली आहे. या प्रकरणी टोळक्या विरोधात गुन्हा दाखल करण्यात आला आहे. राठोड धायरीतील चव्हाण आळीतून जात होता. त्या वेळी टोळक्याने त्याला अडवले. टोळक्यातील एका आरोपीशी राठोडचे भांडण झाले होते. त्यावेळच्या वादातून टोळक्याने राठोडवर कोयत्याने वार केले. परिसरातील दुचाकींची तोडफोड करून टोळके पसार झाले. पोलिस उपनिरीक्षक चेतन थोरबोले या गुन्ह्याचा तपास करीत आहेत.