व्हीनस कलामहोत्सव आजपासून

पुणे, ता. १६ : व्हीनस ट्रेडर्सतर्फे आयोजित ‘व्हीनस कलामहोत्सवा’ला आजपासून (ता. १७) सुरुवात होणार आहे. शुक्रवार (ता. १७) ते रविवार (ता. १९) या कालावधीत घोले रस्त्यावरील राजा रवी वर्मा आर्ट गॅलरी येथे सकाळी अकरा ते रात्री आठ या वेळेत हा महोत्सव विनामूल्य खुला असणार आहे.

महोत्सवाचे उद्‍घाटन अभिनेते गिरीश कुलकर्णी यांच्या हस्ते होणार असून, या वेळी चित्रकार डॉ. सुधाकर चव्हाण, डॉ. सुभाष पवार, प्रमोद कांबळे यांचा सत्कार करण्यात येणार आहे. तसेच रिजनल कॅमेल आर्ट फाउंडेशन’तर्फे घेण्यात आलेल्या स्पर्धेतील विजेते सुरभी गुळविलकर आणि रूपेश सोनार यांना बक्षीस दिले जाणार आहे. महोत्सवात शुक्रवारी (ता. १७) सायंकाळी पाच वाजता मनोहर देसाई यांचे ‘कॅलिग्राफी पेंटिंग’ विषयक आणि शनिवारी (ता. १८) सायंकाळी ५.३० वाजता विलास कुलकर्णी यांचे जलरंगावरील प्रात्यक्षिक सादर होईल. तर रविवारी (ता. १९) सकाळी अकरा ते सायंकाळी पाच वाजेपर्यंत लहान मुलांसाठी घनश्याम देशमुख यांची चित्रकला कार्यशाळा होणार आहे.