गड्या आपली रिक्षाच बरी | Sakal
sakal

बोलून बातमी शोधा

Rickshaw
गड्या आपली रिक्षाच भारी

गड्या आपली रिक्षाच बरी

- प्रसाद कानडे

पुणे - कंपनीस सुरुवातीला प्रत्येक ट्रीपमागे १५ ते २० टक्के कमिशन द्यावे लागत होते, ते आता ३० ते ३५ टक्क्यांवर पोचले. तसेच, जीएसटी व थर्ड पार्टीच्या नावाखालीही कंपनीला पैसे द्यावे लागतात. त्यामुळे हातात थोडीच रक्कम शिल्लक राहते. दिवसागणिक वाढणारे इंधनाचे दर अन् गाडीचा हप्ता यातून नफा तर सोडाच, घर भागविणेही अवघड झाले आहे. त्यामुळे कॅबचा व्यवसाय सोडला अन रिक्षाचा व्यवसाय सुरू केला असल्याचे ज्ञानेश्वर घोडके सांगत होते. घोडके हे पुण्यातील कॅबचालकांचे प्रातिनिधिक उदाहरण. मात्र गेल्या काही दिवसांत वेगवेगळ्या कारणांमुळे पुण्यातील कॅबचालकांची संख्या घटत असून त्यांचा ट्रेंडही बदलत आहे. कॅबचे चालक आता रिक्षाचालक बनत आहेत.

कॅबचालकांचा ट्रेंड बदलण्याची अनेक कारणे आहेत. त्यापैकी सर्वांत महत्त्वाचे कारण म्हणजे कंपन्यांनी वाढविलेले कमिशन. रिक्षाला एका ट्रिपसाठी कंपनीला ९ ते १० टक्के कमिशन द्यावे लागते. मात्र, कॅबचालकास ३० ते ३५ टक्के कमिशन द्यावे लागते. रिक्षा चालकास जीएसटी व थर्ड पार्टी द्यावे लागत नाही. मात्र, कॅब चालकांना जीएसटी व थर्ड पार्टी द्यावे लागते. कॅबचे वाटेकरी तीन झाले तर रिक्षाला केवळ कमिशनच द्यावे लागते. परिणामी, व्यवसायात खर्च कमी आणि नफा अधिक अशी परिस्थिती निर्माण झाली आहे. हे पाहून अनेकांनी रिक्षाचा व्यवसाय स्वीकारला.

कॅबचा व्यवसाय का सोडला

1) रिक्षा व्यवसायात खर्च कमी असल्याने पैशांची बचत होते. परिणामी नफा वाढतो.

2) कोरोनाच्या काळात ठप्प झालेली व्यवस्था. कॅब चालकांनी फायनान्स कंपनी अथवा बँकेकडून घेतलेले कर्ज फेडू न शकल्याने जवळपास तीन ते चार हजार गाड्या जप्त झालेल्या आहेत.

3) अनेकांनी दोन वर्षांत गाडी बंदच ठेवली. आता त्यांना गाडी पुन्हा सुरू करण्यासाठी पासिंग, इन्शुरन्ससारखी कामे करावी लागतील, त्यासाठी २० ते २५ हजार रुपयांचा खर्च. तेवढी आर्थिक स्थिती नसल्याने गाड्या बंद ठेवून अन्य व्यवसायाकडे वळले आहेत.

4) प्रवासी सेवा देणाऱ्या कंपन्यांनी आपल्या कमिशनच्या स्ट्रक्चरमध्ये मोठे बदल केले. कमिशनच्या दरात वाढ.

आकडे बोलतात....

  • ३८ हजार पुणे आरटीओकडे कॅबची नोंद

  • सुमारे १० हजार दोन वर्षांत कॅबचालकांची घटलेली संख्या

  • सुमारे २२ हजार पुण्यात सध्या धावणाऱ्या कॅब

  • यातील ३२ हजार खासगी सेवा देणाऱ्या संस्थेकडे नोंद

याचा परिणाम काय?

  • कॅबची संख्या घटली. परिणामी, प्रवाशांना कॅब बुक करण्यासाठी अर्ध्या तासापर्यंत वाट पहावी लागते.

  • रिक्षांच्या संख्येत वाढ. परिणामी रिक्षा व्यवसायात प्रतिस्पर्धी वाढत असल्याने रिक्षा व्यवसायाची स्थिती गंभीर झाली.

  • खासगी वाहनांचा वापर वाढला.

विविध कारणांमुळे कॅबच्या संख्येत घट होत आहे. माझ्या अंदाजाप्रमाणे १० ते १२ हजारने कॅबची संख्या घटली आहे. त्यामुळे त्यांच्या उपलब्धतेवर विपरीत परिणाम झाला आहे. याचा फटका प्रवाशांना बसत आहे.

- बाबा शिंदे, अध्यक्ष, महाराष्ट्र वाहन चालक मालक प्रतिनिधी संघ

गेल्या काही महिन्यांत कॅबचालक रिक्षाच्या व्यवसायात आले आहेत. आधीच रिक्षा व्यवसायाची स्थिती खराब आहे. त्यात आता कॅबचालकांची भर पडत आहे. हे व्यवसायाच्या दृष्टीने धोक्याचे आहे. त्यामुळे परिवहन विभागाने रिक्षाचा खुला परवाना बंद करावा, अशी मागणी आहे.

- नितीन पवार, सरचिटणीस, रिक्षा पंचायत, पुणे

आपला अनुभव सांगा...

कॅबची संख्या घटल्याने प्रवाशांना कॅब बुक करण्यासाठी अर्ध्या तासापर्यंत वाट पहावी लागत आहे. याबाबत आपला अनुभव editor.pune@esakal.com या मेलवर किंवा ८४८४९७३६०२ या व्हॉट्सॲप क्रमांकावर कळवा.

Web Title: Todays Latest Marathi News Pne22m84365 Txt Pune Today

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top