पुणे विभागामध्ये कॉपीमुक्त अभियान

पुणे, ता. १७ ः दहावी आणि बारावीच्या परीक्षेत परीक्षा केंद्रांवर कोणत्याही प्रकारचे गैरप्रकार होऊ नयेत, याकरिता १०० टक्के कॉपीमुक्त अभियान पुणे विभागातील पुणे, सातारा, सोलापूर, कोल्हापूर व सांगली जिल्ह्यातील सर्व संबंधितांनी यशस्वीरीत्या राबवावे. पुणे विभागाचा राज्यात नवा पॅटर्न करावा, असे आवाहन विभागीय आयुक्त सौरभ राव यांनी केले.

महाराष्ट्र राज्य माध्यमिक व उच्च माध्यमिक शिक्षण मंडळातर्फे उच्च माध्यमिक प्रमाणपत्र परीक्षा अर्थात इयत्ता बारावी २१ फेब्रुवारी ते २१ मार्च २०२३ या कालावधीत तर माध्यमिक शालान्त प्रमाणपत्र अर्थात इयत्ता दहावीची परीक्षा २ ते २५ मार्च या कालावधीत होणार आहे. शासनाच्या विविध विभागांच्या समन्वयातून परीक्षा कालावधीत परीक्षा केंद्रांवर होणारे गैरप्रकार रोखण्यासाठी ‘कॉपीमुक्त अभियान’ राबविणार आहे. याबाबत विद्यार्थी, पालक, शिक्षक, संस्थाचालकांचे उदबोधन करणार आहे. तसेच, अभियानाबाबत जनजागृतीही करणार आहे. हे अभियान यशस्वीपणे राबविण्यासाठी, परीक्षा सुरळीत व सुरक्षित वातावरणात पार पाडण्यासाठी विभागनिहाय व जिल्हानिहाय भरारी पथक, दक्षता समितीची नियुक्ती केली आहे.