सूक्ष्म नियोजनावर भर द्यावा ः देशपांडे

पुणे, ता. २० : प्रत्येक निवडणूक प्रक्रियेत नवा अनुभव येत असल्याने चिंचवड आणि कसबा विधानसभा मतदारसंघाच्या पोटनिवडणुकीसाठी सूक्ष्म नियोजनावर भर द्यावा, असा आदेश राज्याचे मुख्य निवडणूक अधिकारी श्रीकांत देशपांडे यांनी दिला.
जिल्हाधिकारी कार्यालयात पोटनिवडणुकीबाबत आयोजित आढावा बैठकीत ते बोलत होते. यावेळी पोलिस आयुक्त रितेश कुमार, विनयकुमार चौबे, निवडणूक निर्णय अधिकारी सचिन ढोले, स्नेहा किसवे-देवकाते, उपजिल्हा निवडणूक अधिकारी आरती भोसले उपस्थित होते.
देशपांडे म्हणाले, ‘‘निवडणुकीसाठी चांगली तयारी झाली आहे. दोन्ही मतदारसंघावर प्रशासनाने चांगले लक्ष केंद्रित केले आहे. निवडणूक कर्मचाऱ्यांच्या मतदानाची योग्य व्यवस्था करण्यात यावी. मतदान केंद्रप्रमुखांच्या प्रशिक्षणात मतदानाच्यावेळी येणाऱ्या अडचणींबाबत मार्गदर्शन करावे. निवडणुकीत सर्व यंत्रणांनी एकत्रितपणे काम करावे, असे आवाहन त्यांनी केले.
जिल्हाधिकारी डॉ. देशमुख यांनी सादारीकरणाद्वारे निवडणूक तयारीची माहिती दिली. राज्यात प्रथमच घरोघरी मतदार मार्गदर्शिका वितरित करण्यात येणार आहे. मतदानासंदर्भातील सर्व तयारी पूर्ण करण्यात येत असल्याचे त्यांनी सांगितले.