धनगर समाजाच्या विद्यार्थ्यांना इंग्रजी माध्यमाच्या निवासी शाळांमध्ये प्रवेश

पुणे, ता. २४ : धनगर समाजाच्या विद्यार्थ्यांना पुणे जिल्ह्यातील इंग्रजी माध्यमाच्या नामांकित निवासी शाळांमध्ये मोफत शिक्षण देण्यासाठी तीन शाळांची निवड केली आहे. पात्र विद्यार्थ्यांनी या योजनेचा लाभ घ्यावा, असे आवाहन समाज कल्याण विभागाने केले आहे.
धनगर समाजाच्या विद्यार्थ्यांनी उच्च शिक्षणात मागे पडू नये तसेच उच्च शिक्षणाच्या बदलत्या परिस्थितीशी त्यांना जुळवून घेणे शक्य व्हावे, यासाठी त्यांना इंग्रजी माध्यमांच्या नामांकित निवासी शाळांमध्ये शिक्षण देण्यास राज्य सरकारच्या इतर मागास बहुजन कल्याण विभागाअंतर्गत मान्यता दिली आहे. या योजनेअंतर्गत विद्यार्थ्यांना शिक्षण, निवास, भोजनाबरोबर इतर सोई-सुविधा शासनाकडून मोफत पुरविल्या जातात. या योजनेंतर्गत शिक्षणासाठी पुणे जिल्ह्यातील जे. आर. गुंजाळ इंग्लिश मीडियम स्कूल ॲण्ड ज्युनिअर कॉलेज (आळेफाटा, ता. जुन्नर), एस. डी. सह्याद्री पब्लिक स्कूल (सीबीएसई) ॲण्ड ज्युनिअर कॉलेज (वाघळवाडी, ता. बारामती) आणि एस. बी. पाटील पब्लिक स्कूल ॲण्ड ज्युनिअर कॉलेज (वनगळी, ता. इंदापूर) या तीन शाळांची निवड केली आहे. जिल्ह्यातील धनगर समाजातील पालकांचे उत्पन्न एक लाख रुपयांपेक्षा कमी आहे, असे विद्यार्थी तसेच विधवा, घटस्फोटीत, निराधार, परित्यक्ता व दारिद्र्य रेषेखालील कुटुंबातील विद्यार्थ्यांनी या शाळांमध्ये प्रवेश घेऊन योजनेचा लाभ घ्यावा, असे आवाहन ‘समाज कल्याण पुणे’च्या सहायक आयुक्त संगीता डावखर यांनी केले आहे.