नगर रस्त्यावरील बीआरटी मार्गाची लवकरच पाहणी

पुणे, ता. ३० : वाहतुकीला अडथळा ठरत असल्याची सातत्याने टीका होत असलेल्या नगर रस्त्यावरील बीआरटी मार्गाची लवकरच संयुक्त समितीमार्फत दोन दिवसांत पाहणी केली जाणार आहे. महापालिका प्रशासन व पीएमपीएमएल प्रशासनाचे अधिकारी याची पाहणी करणार आहेत, त्यानंतर महापालिका प्रशासन पुढील निर्णय घेणार असल्याचे महापालिका आयुक्त विक्रमकुमार यांनी स्पष्ट केले.

नगर रस्त्यावरील बीआरटी मार्गामुळे वाहतूक कोंडी होत असल्याबाबत सातत्याने टीका होत आहे. दरम्यान, आमदार सुनील टिंगरे यांनीही हा मुद्दा अधिवेशनात उपस्थित केला होता. तर विरोधी पक्षनेते अजित पवार यांनीदेखील या रस्त्याची पाहणी करून बीआरटीविरोधात भाष्य केले होते. या बीआरटी मार्गामुळे वाहतूक कोंडीत भर पडण्याबरोबरच पावसाच्या पाण्यालाही अडथळा ठरत आहे. बीआरटी मार्गातच मेट्रो मार्गाचेही खांब येणार आहेत. सर्व प्रश्न बीआरटीशी निगडित आहे. तर दुसरीकडे पीएमपीएमएल प्रशासनाकडून बीआरटी काढू नये, अशी भूमिका घेतली जात आहे.

दरम्यान, ‘पीएमआरडीए’च्या हद्दीत देण्यात येणाऱ्या बससेवेच्या संचलनातील सुमारे १८८ कोटी रुपयांची तूट भरून देण्यासंदर्भात पीएमपीएमएलने मागणी केली आहे. पीएमआरडीएच्या ग्रामीण भागात पीएमपीकडून बससेवा दिली जाते. या बससेवेमुळे संचलनातील तूट भरून मिळावी अशी मागणी केली जात होती. मुख्यमंत्री एकनाथ शिंदे यांनी गेल्या महिन्यात पीएमआरडीएच्या प्रतिनिधीचा पीएमपीच्या संचालक मंडळात समावेश करण्याचा निर्णय घेतला. यामुळे तुटीची रक्कम मिळण्यातील तांत्रिक अडचण दूर झाली. गेल्या वर्षभरात पीएमआरडीएच्या हद्दीतील बस संचलनाची तुटीची रक्कम ४७ कोटी रुपये इतकी आहे. तुटीची रक्कम देण्यासंदर्भातील निर्णय पीएमआरडीएच्या बैठकीत होणार आहे.

पीएमपीएमएलच्या संचालक मंडळाच्या बैठकीत या मार्गाबाबत चर्चा झाली. त्यानुसार महापालिका व पीएमपीएमएलचे अधिकारी पुढील दोन दिवसांत बीआरटी मार्गाची प्रत्यक्ष पाहणी करणार आहेत. त्याचा अहवाल आल्यानंतरच महापालिका निर्णय घेणार आहे.
- विक्रमकुमार, महापालिका आयुक्त