औद्योगिक सुरक्षेबाबत जागृती

पुणे, ता. ३० : राष्ट्रीय सुरक्षा सप्ताह आणि स्पेक्ट्रम सुरक्षा वर्षानिमित्त रंग उद्योगाची शिखर संस्था असलेल्या ‘स्पेक्ट्रम सेफ्टी कौन्सिल’तर्फे सुरक्षा अभियान राबविण्यात आले. गेल्या १५ वर्षांपासून हा उपक्रम करण्यात येत आहे, अशी माहिती स्पेक्ट्रम संस्थेचे अध्यक्ष आणि रंग तंत्रज्ञ पंकज शाह यांनी दिली. ५२ व्या जागतिक सुरक्षा सप्ताहाच्या समारोप दिनानिमित्त कौन्सिलतर्फे टीआयपी ऑडिटोरिअममध्ये लीन सेफ्टी या विषयावर एक चर्चासत्र आयोजित करण्यात आले होते.
कोटिंग मॅनेजमेंट सल्लागार डॉ. ए. जे. सिंग, कॉर्पोरेट ट्रेनर उज्ज्वल तावडे, टीआयपीचे प्राचार्य डॉ. आर. एच. डोंगरे आणि कोरोकोट पॉलिमर्सचे लीन चॅम्पियन किरण गोंधळी यावेळी उपस्थित होते. डॉ. डोंगरे यांनी सर्व स्तरावर सुरक्षेची जाणीव आणि सुरक्षेचे महत्त्व निर्माण करण्यासाठी अशा सेमिनारची उपयुक्तता, उपयोगिता आणि आवश्यकता याबद्दल माहिती दिली. डॉ. सिंग यांनी रिजेक्शन कमी करण्यासाठी, गुणवत्ता सुधारण्यासाठी, उत्पादकता वाढवण्यासाठी आणि कामाच्या ठिकाणी सुरक्षा मूल्य वाढविण्यासाठी लीन तत्त्वे आणि त्याचा उपयोग याविषयी मार्गदर्शन केले. तर तावडे यांनी त्यांचा प्रवास मांडला. शाह यांनी सुरक्षेसाठी बांधिलकी आणि प्रतिनिधींमध्ये सुरक्षिततेबद्दल जागरूकता निर्माण करण्यासाठी सुरक्षा शपथ आणि प्रतिज्ञा दिली. त्यांनी कौन्सिलच्या गेल्या १५ वर्षांच्या प्रवासाची माहिती दिली. समन्वयक सतीश चव्हाण यांनी मान्यवरांचे स्वागत केले.