शहरात पावसाच्या हलक्या सरींची शक्यता

मॉन्सून दोन-तीन दिवसांत
कन्याकुमारीत येण्याचा अंदाज
पुणे, ता. ३० ः गेल्या आठवडाभरापासून थांबलेली मॉन्सूनची वाटचाल अखेर पुन्हा सुरू झाली. पुढील दोन ते तीन दिवसांत मॉन्‍सून मालदीव, कन्याकुमारीसह बंगालच्या उपसागराच्या मध्य भागात पोहोचण्याची शक्यता असल्याचे हवामानशास्त्र विभागाने नमूद केले.
मॉन्सून अंदमानात सरासरी तारखेपेक्षा आठ दिवस उशिराने दाखल झाला आहे. अंदाजे तारीख २२ मे होती, मात्र १९ मे पासून मॉन्सूनचा प्रवास ‘जैसे थे’ होता.
दरम्यान, पुणे शहरात गेल्या दोन दिवसांपासून पूर्वमोसमी पाऊस हजेरी लावत आहे. बुधवारी (ता. ३१) शहर आणि परिसरात ढगाळ वातावरणासह पावसाची शक्यता आहे. शहरात सध्या सकाळी ऊन आणि दुपारनंतर ढगाळ वातावरणासह पाऊस असे हवामान आहे.
दरम्यान, कमाल तापमानातील वाढ मात्र कायम आहे. पुढील तीन दिवस शहर आणि परिसरात ढगाळ वातावरणाचा, तर बुधवारी (ता. ३१) दुपारनंतर पावसाचा अंदाज आहे. पावसाच्या हजेरीमुळे दिवसा जाणवणाऱ्या उन्हाचा ताप मात्र काहीसा कमी होत आहे.
राज्यातही तुरळक ठिकाणी पावसाने हजेरी लावली असून ढगाळ हवामानामुळे कमाल तापमानातील चढ-उतार सुरू आहे. मंगळवारी (ता. ३०) राज्यातील उच्चांकी तापमानाची नोंद अकोला येथे ४२.७ अंश सेल्सिअस इतकी झाली. मराठवाड्यात पारा चाळीस अंशांच्या दरम्यान कायम असून त्यातच राज्यात पावसासाठी पोषक स्थिती निर्माण होत आहे. सध्या नैऋत्य राजस्थान आणि परिसरावर चक्राकार वाऱ्यांची स्थिती आहे. दक्षिण अंदमान समुद्रावर चक्राकार वाऱ्यांच्या स्थिती तयार झाली आहे. पश्‍चिम विदर्भापासून मराठवाडा, कर्नाटक, दक्षिण तमिळनाडूपर्यंत हवेचा कमी दाबाचा पट्टा निर्माण झाला आहे. यामुळे बुधवारी (ता. ३१) मध्य महाराष्ट्र आणि मराठवाड्याच्या दक्षिण भागासह विदर्भात पावसाचा इशारा देण्यात आला आहे.
-----