महिला कर्मचाऱ्यांची चार केंद्रावर नियुक्ती नाही

पुणे, ता. ३१ : आंबेगाव, दौंड, इंदापूर आणि मावळ या तालुक्यांतील प्रत्येकी एक अशा चार मतदान केंद्रांवर एकाही महिला कर्मचाऱ्यांची नियुक्ती न करण्याचा निर्णय जिल्हा प्रशासनाने घेतला आहे. महिलांसाठी ही केंद्रे गैरसोयीची असल्यामुळे हा निर्णय घेण्यात आला असून त्या अनुषंगाने विविध उपाययोजना करण्याचा निर्णय जिल्हा निवडणूक प्रशासनाने घेतला आहे.
मतदान केंद्रांवर महिला कर्मचाऱ्यांची नियुक्ती करताना निवासाची व्यवस्था, प्रसाधनगृह आणि इतर आवश्यक सुविधा मतदान केंद्राजवळ देण्यात येतात. मात्र, ज्या परिसरात अशा सुविधा उपलब्ध करून देण्यासाठी यंत्रणा नाही. तसेच वाडीवस्तीपासून मतदान केंद्र दूर आहे. वाहतुकीसाठी कोणतीही सुविधा नाही. दुर्गम भाग असल्याने पहाटे उठून मतदान केंद्रांवर पोचणे शक्य नाही. अशा परिसरातील मतदान केंद्रांवर महिला कर्मचाऱ्यांची नियुक्ती करू नये, असे निवडणूक आयोगाने सूचना दिल्या आहेत. त्यानुसार जिल्ह्यातील आठ हजार ४६२ मतदान केंद्रांपैकी आंबेगाव, दौंड, इंदापूर आणि मावळ या चार तालुक्यात अशी प्रत्येकी एक मतदान केंद्र गैरसोयीचे असल्याचे निदर्शनास आले आहे.
इंदापूर तालुक्यातील वालचंदनगर येथील मतदान केंद्र गावापासून दूर आहे. त्यामुळे मतदानाच्या दिवशी महिला कर्मचाऱ्यांना मतदान यंत्र घेऊन मतदान केंद्रावर वेळेत पोचणे शक्य होणार नाही. तसेच इतर सुविधा नसल्याने या ठिकाणी एकाही महिला कर्मचाऱ्याची नियुक्ती करण्यात येणार नाही, अशी माहिती सहायक निवडणूक अधिकारी तथा इंदापूरचे तहसीलदार जीवन बनसोडे यांनी दिली.

ही आहेत ती केंद्रे
विधानसभा मतदान संघ-- केंद्र क्रमांक---- परिसर
आंबेगाव---------- १७--------- पिंपरी
दौंड--------- २३२---------- पाटस
इंदापूर------- २४६-------- वालचंदनगर
मावळ------- २३--------- उधेवाडी