ससूनमधील रक्तदान शिबिरास प्रतिसाद

पुणे, ता. २५ : बी. जे. शासकीय वैद्यकीय महाविद्यालय व ससून सर्वोपचार रुग्णालय येथील रक्त केंद्रात १४ ते १७ मेदरम्यान चारदिवसीय रक्तदान शिबिर पार पडले. नाशिकच्‍या महाराष्ट्र आरोग्य विज्ञान विद्यापीठाच्‍या सूचनेनुसार सीमाभागातील आपत्कालीन परिस्थितीच्या पार्श्‍वभूमीवर रक्त साठा राखण्यासाठी हे शिबिर आयोजित केले होते. यामध्ये ८३ युनिट रक्त संकलन झाले.
एमबीबीएस, एमडी विद्यार्थी, प्राध्यापक व रुग्णालय कर्मचाऱ्यांनी उत्साहाने व सामाजिक बांधिलकीची जाणीव ठेवून रक्तदान केले. शिबिराचे आयोजन अधिष्ठाता डॉ. एकनाथ पवार, वैद्यकीय अधीक्षक डॉ. यल्लाप्पा जाधव व उपवैद्यकीय अधीक्षक डॉ. सोमनाथ खेडकर यांच्या मार्गदर्शनाखाली केले होते. रक्त केंद्रप्रमुख डॉ. वर्षा भाटिया यांनी रक्तदात्यांचे आभार मानले.
‘‘हा सामूहिक उपक्रम आरोग्य क्षेत्रातील सेवाभाव, एकोप्याची भावना व करुणा दर्शवतो. अशा संकटाच्या काळात आरोग्य व्यवस्था सक्षम करण्यासाठी इतर महाविद्यालये, रुग्णालये व संस्थांनी रक्तदान शिबिरे आयोजित करावीत, असे आवाहन डॉ. पवार यांनी केले.