एलपीजी वितरकांचा आंदोलनाचा इशारा

पुणे, ता. २५ : देशातील एलपीजी वितरकांनी योग्य सेवा शुल्कात वाढ करण्याच्या मागणीसाठी देशव्‍यापी आंदोलन करण्याचा इशारा दिला आहे. ‘एलपीजी डिस्ट्रिब्युटर्स असोसिएशन ऑफ इंडिया’ या संघटनेच्या नेतृत्वाखाली होणाऱ्या या आंदोलनात इंडेन, एचपी गॅस, भारत गॅस या कंपन्‍यांनी सहभाग घेतला आहे.
वाढता वितरण खर्च, प्रशासकीय अडचणी आणि सेवा शुल्कातील असमानतेमुळे आंदोलनाचा निर्णय घेतला आहे. पुण्‍यातील ४५० व देशातील २५ हजार गॅस वितरक आंदोलनात सहभागी होणार आहेत, अशी माहिती संघटनेच्‍या राष्‍ट्रीय सचिव श्‍वेता पाटील यांनी दिली.
घरपोच वितरण व प्रशासकीय शुल्कात किमान ७५ रुपयांची वाढ करावी अशी मागणी संघटनेने केंद्र सरकारकडे केली आहे. त्‍यासाठी आंदोलनाचे टप्पे ठरले आहेत. वितरकांनी शुक्रवारी काळ्याफिती बांधून जिल्हाधिकाऱ्यांना निवेदन दिले. २९ ऑक्टोबरला मशाल व मेणबत्ती मोर्चा काढून निषेध नोंदवला जाईल तर ६ नोव्हेंबरला ‘नो मनी, नो इंडेंट’ या मोहिमेंतंर्गत कोणतीही रक्कम जमा केली जाणार नाही. जर सरकारने मागण्या मान्य केल्या नाही, तर सर्व वितरक संपावर जातील, असा इशारा दिला आहे.