अतिविलंब शुल्कासह करा ३१ डिसेंबरपर्यंत नोंदणी दहावी-बारावीच्या परीक्षेसाठी खासगी विद्यार्थ्यांसाठी मुदत

पुणे, ता. ३१ : महाराष्ट्र राज्य माध्यमिक व उच्च माध्यमिक शिक्षण मंडळातर्फे दहावी आणि बारावीच्या परीक्षेसाठी खासगी विद्यार्थ्यांना अतिविलंब शुल्कासह ३१ डिसेंबरपर्यंत नावनोंदणी अर्ज भरता येणार आहे. राज्य मंडळातर्फे होणाऱ्या दहावी-बारावीच्या परीक्षेसाठी विद्यार्थ्यांना खासगीरीत्या फॉर्म नंबर १७ भरून परीक्षा देण्याची सुविधा उपलब्ध करून दिली आहे. सर्व शाळा, कनिष्ठ महाविद्यालये खासगी विद्यार्थ्यांच्या नावनोंदणी करता उपलब्ध आहेत. फेब्रुवारी-मार्च २०२६ मध्ये होणाऱ्या दहावी आणि बारावीच्या परीक्षेसाठी खासगी विद्यार्थी नावनोंदणी अर्ज (फॉर्म नंबर १७) अतिविलंब शुल्कासह ऑनलाइन स्वीकारण्यासाठी १ नोव्हेंबर ते ३१ डिसेंबरपर्यंतचा कालावधी दिला आहे.
पात्र विद्यार्थ्यांना नावनोंदणी प्रमाणपत्र ऑनलाइन देण्यात येणार आहे. नावनोंदणी प्रमाणपत्र प्राप्त झाल्यानंतर पात्र विद्यार्थ्यांनी परीक्षेचे ऑनलाइन अर्ज राज्य मंडळाने दिलेल्या मुदतीत परीक्षा शुल्कासह भरणे आवश्यक आहे. अर्ज भरल्यानंतर संबंधित विद्यार्थ्यांनी छाननीसाठी दिलेली मूळ कागदपत्रे संबंधित माध्यमिक शाळा, कनिष्ठ महाविद्यालयांकडून परत घेऊन जावीत, अशी स्पष्ट सूचनाही राज्य मंडळाने दिली आहे.