‘वंदे मातरम्’च्या १५० व्या वर्षपूर्तीनिमित्त ‘संगीत आनंदमठ’

पुणे, ता. १ : भारतीय स्वातंत्र्यलढ्यासाठी प्रेरणादायी ठरलेल्या ‘वंदे मातरम्’ या गीताला यंदा १५० वर्षे पूर्ण होत आहेत. यानिमित्त पुणे पुस्तक महोत्सव, वंदे मातरम् सार्धशती जयंती समारोह समिती, जन्मदा प्रतिष्ठानतर्फे येत्या शुक्रवारी (ता. ७) दुपारी चार वाजता बालगंधर्व रंगमंदिरात ‘वंदे मातरम्’चा उत्सव साजरा करण्यात येणार आहे.
यावेळी ‘संगीत आनंदमठ’ या नाटकाचा प्रयोग आणि ‘ध्यास वंदे मातरम्‌चा’ या पुस्तकाचे प्रकाशन राज्याचे सांस्कृतिक कार्यमंत्री आशिष शेलार यांच्या प्रमुख उपस्थितीत होणार आहे. केंद्रीय नागरी हवाई वाहतूक व सहकार राज्यमंत्री मुरलीधर मोहोळ आणि राज्याचे उच्च व तंत्रशिक्षणमंत्री चंद्रकांत पाटील प्रमुख पाहुणे म्हणून उपस्थित राहणार असल्याची माहिती पुणे पुस्तक महोत्सवाचे मुख्य संयोजक राजेश पांडे यांनी दिली.
‘संगीत आनंदमठ’ हे नाटक बंकिमचंद्र चॅटर्जी यांच्या अजरामर ‘आनंदमठ’ कादंबरीवर आधारित आहे. या नाटकाचे नाट्यरूपांतर विनिता तेलंग यांनी केले असून, दिग्दर्शन रवींद्र सातपुते यांचे आहे. त्यानंतर ‘वंदे मातरम्’‌चे अभ्यासक मिलिंद सबनीस लिखित आणि विश्‍वकर्मा पब्लिकेशन्सतर्फे प्रकाशित ‘ध्यास वंदे मातरम्‌चा’ या पुस्तकाचे प्रकाशन होणार आहे. या दोन्ही कार्यक्रमांना विनामूल्य प्रवेश आहे.