घरफोड्या करणारी टोळी विमानतळ पोलिसांकडून गजाआड

पुणे, ता. १२ : दिवाळीच्या सुट्टीत बंद सदनिकांमध्ये घरफोडी करून ऐवज लुटणाऱ्या टोळीला विमानतळ पोलिसांनी अटक केली आहे. या सराईत चोरट्यांकडून पोलिसांनी १४ लाख रुपयांचा मुद्देमाल जप्त केला असून, आठ घरफोडीच्या गुन्ह्यांचा उलगडा करण्यात आला आहे.
याप्रकरणी आरोपी शिवम दत्ता अवचर (वय १९, रा. नऱ्हे), नवनाथ ऊर्फ लखन बाळू मोहिते (वय २२, वैदूवाडी, हडपसर) या दोघांना अटक केली, तर पर्वतीमधून एका १६ वर्षीय अल्पवयीन मुलाला ताब्यात घेतले आहे. हे आरोपी सराईत गुन्हेगार असून, पोलिसांना चकविण्यासाठी ठिकाणे बदलत होते. तांत्रिक विश्‍लेषण आणि गोपनीय माहितीच्या आधारे विमानतळ पोलिसांनी सापळा रचून त्यांना अटक केली.
पोलिसांनी दिलेल्या माहितीनुसार, विमाननगर परिसरातील एका फिर्यादीच्या घराच्या दरवाजाचे कडी-कोयंडे कापून चोरट्यांनी १० लाख ५१ हजार रुपयांचे सोन्या-चांदीचे दागिने आणि रोकड चोरी केली होती. वरिष्ठांच्या सूचनेनुसार, पोलिस अंमलदार योगेश थोपटे, ज्ञानदेव आवारी, लालू कऱ्हे आणि हरिप्रसाद पुंडे यांनी परिसरातील २५० सीसीटीव्ही चित्रीकरण तपासले. या तपासातून आरोपींचा शोध लागला.
या कारवाईत पोलिसांनी १० लाख रुपयांचे सोन्याचे दागिने आणि चोरीत वापरलेली दुचाकी जप्त केली. पुढील तपासात आरोपींनी दिवाळीदरम्यान घरफोडीचे सात गुन्हे केल्याचे उघड झाले. यात पोलिसांनी सोन्याचे दागिने, रोकड, तसेच दुचाकी असा सुमारे १४ लाखांचा मुद्देमाल जप्त केला आहे.
ही कारवाई अतिरिक्त पोलिस आयुक्त मनोज पाटील, पोलिस उपायुक्त सोमय मुंडे आणि सहाय्यक आयुक्त प्रांजली सोनवणे यांच्या मार्गदर्शनाखाली वरिष्ठ निरीक्षक गोविंद जाधव, पोलिस निरीक्षक (गुन्हे) शरद शेळके, पोलिस उपनिरीक्षक मनोज बरुरे, नितीन राठोड यांच्या पथकाने केली.